ഇടുക്കി

സുപ്രീംകോടതി ഉന്നതാധികാര സമിതിയുടെ നിര്‍ദേശ പ്രകാരം മുല്ലപ്പെരിയാര്‍ ഡാമില്‍ സാങ്കേതിക വിദഗ്ധര്‍ പരിശോധന ആരംഭിച്ചു. സെന്‍ട്രല്‍ സോയില്‍ മെറ്റീരിയല്‍ റിസെര്‍ച്ചിലെ വിദഗ്ധരായ അലക്സ് വര്‍ഗീസ്, ബീരേന്ദ്ര പ്രതാപ്, ശിവ ശരണ്‍ എന്നിവരാണു പരിശോധന നടത്തുന്നത്.

റിമോട്ട് ഓപ്പറേറ്റഡ് അന്‍ഡര്‍ വാട്ടര്‍ വെഹിക്കിള്‍ ഉപയോഗിച്ചാണു പരിശോധന നടത്തുന്നത്. അണക്കെട്ടിന്‍റെ വെള്ളത്തിനടിയിലെ ഭാഗങ്ങള്‍ അടയാളപ്പെടുത്തിയ ശേഷം സ്കാന്‍ ചെയ്തു പഠനം നടത്താനാണു ലക്ഷ്യമിടുന്നത്. വെഹിക്കിള്‍ ഉപയോഗിച്ച് അണക്കെട്ടിന്‍റെ വിള്ളലുകളും ദ്വാരങ്ങളും ചിത്രീകരിക്കും. ചിത്രങ്ങള്‍ മോണിറ്ററിലൂടെ കാണുവുന്നതും റെക്കോഡ് ചെയ്തു സൂക്ഷിക്കാവുന്നതുമാണ്.

പരിശോധനയ്ക്കിടെയുണ്ടാകുന്ന തടസങ്ങള്‍ പരിഹരിക്കാന്‍ ചെന്നൈയില്‍ നിന്നുള്ള മുങ്ങല്‍ വിദഗ്ധരും എത്തിയിട്ടുണ്ട്. തമിഴ്നാട് ജലസേചന വകുപ്പ് അധികൃതരും കേരളത്തിനെ പ്രതിനിധീകരിച്ചു ജലവകുപ്പ് എക്സിക്യൂട്ടിവ് എന്‍ജിനീയറും അസിസ്റ്റന്‍റ് എന്‍ജിനീയറും അണക്കെട്ടിലെത്തി.