കൊച്ചി: ഇലക്ട്രിക് വാഹനങ്ങള്ക്കുള്ള ഫാസ്റ്റ് ചാര്ജിങ് സ്റ്റേഷനുകള് ലഭ്യമാക്കുന്ന മുന്നിര കേരള സ്റ്റാര്ട്ടപ്പായ ഗോ ഇ സി ഓട്ടൊടെക് പ്രൈവറ്റ് ലിമിറ്റഡ്- ഇവി ചാര്ജിങ് നെറ്റ്വര്ക്ക്, കൊച്ചി ലുലു മാളില് ഇലക്ട്രിക് വെഹിക്കിള്സ് സൂപ്പര് ചാര്ജിങ് സ്റ്റേഷന് ആരംഭിച്ചു. ലുലു മാളിലെ എന്എച്ച് 17 എക്സിറ്റ് ഏരിയയില് സ്ഥാപിച്ച ഗോ ഇ സി സ്റ്റേഷന്, എറണാകുളം എംപി ഹൈബി ഈഡന് ഉദ്ഘാടനം ചെയ്തു.
സംസ്ഥാനത്ത് സുസ്ഥിരവും പരിസ്ഥിതി സൗഹൃദവുമായ മൊബിലിറ്റി പ്രോത്സാഹിപ്പിക്കുന്നതിനുള്ള കമ്പനിയുടെ ശ്രമങ്ങളിലെ സുപ്രധാന നാഴികക്കല്ലാണ് ഈ ലോഞ്ച്. അത്യാധുനിക സൗകര്യങ്ങളോടു കൂടിയ പുതിയ ചാര്ജിങ് സ്റ്റേഷന്, ഇലക്ട്രിക് വാഹനങ്ങള്ക്ക്, വേഗതയേറിയതും കാര്യക്ഷമവുമായ ചാര്ജിങ് യാഥാർഥ്യമാക്കും. രാജ്യത്തുടനീളം നൂറിലധികം ചാര്ജിങ് സ്റ്റേഷനുകളുള്ള ഗോ ഇ സിയുടെ ഇവി ചാര്ജിങ് ശൃംഖല കേരളത്തിനകത്തും പുറത്തും ഏറെ സ്വീകാര്യതയുള്ള സംരംഭമാണ്.
വാഹന മേഖലയുടെ ഭാവി ഇലക്ട്രിക് ആണെന്നും, ഉപയോക്താക്കള്ക്ക് സുസ്ഥിരമായ മൊബിലിറ്റി സൊല്യൂഷനുകള് നല്കുന്നതിന് ഗോ ഇസി പ്രതിജ്ഞാബദ്ധരാണെന്നും കമ്പനിയുടെ സിഇഒയും എക്സിക്യൂട്ടിവ് ഡയറക്റ്ററുമായ പി.ജി. രാംനാഥ് പറഞ്ഞു. കൊച്ചി ലുലുമാളില് ഇവി സൂപ്പര് ചാര്ജിങ് സ്റ്റേഷന് ആരംഭിക്കുന്നത്, കമ്പനിയുടെ സ്ഥാപിത ലക്ഷ്യത്തിന് കൂടുതല് കരുത്തേകും.
ലുലു മാളുമായി ഗോ ഇ സി കൈകോര്ക്കുന്ന രണ്ടാമത്തെ ഔട്ട്ലെറ്റാണ് കൊച്ചിയിലേത്. നേരത്തേ തിരുവനന്തപുരം ലുലു മാളില് സ്ഥാപിച്ച അവരുടെ ആദ്യ ചാര്ജിങ് സ്റ്റേഷന് വിജയകരമായി പ്രവര്ത്തനം തുടരുകയാണ്. കൊച്ചിയിലെ പുതിയ ചാര്ജിങ് സ്റ്റേഷന് പൂര്ണമായും "മാന്ലെസ്' മെഷീനാണ്. നാല് പോര്ട്ടുകളാണ് ഇവിടെയുള്ളത്. ഭാവിയില് ലുലു ഗ്രൂപ്പിന് കീഴിലുള്ള മറ്റ് മാളുകളിലും ഗോ ഇ സി സൂപ്പര് ചാര്ജിങ് സ്റ്റേഷനുകള് സ്ഥാപിക്കും.
ചടങ്ങിൽ ലുലു ഇന്ത്യ ഷോപ്പിങ് മാള് ഡയറക്റ്റര് ഷിബു ഫിലിപ്പ്, ലുലു കൊച്ചി ഓപ്പറേഷന്സ് വിഭാഗം സീനിയര് മാനെജര് ഒ. സുകുമാരന്, ലുലു കൊച്ചി ജിഎം എം. ഹരി സുഹാസ്, ഗോ ഇ സി ചെയര്മാനും മാനെജിങ് ഡയറക്റ്ററുമായ എ.പി. ജാഫര്, ഗോ ഇ സി ഡയറക്റ്റര് സാറ എലിസബത്ത്, മാര്ക്കറ്റിങ് ഹെഡ് ജോയല് യോഹന്നാന് തുടങ്ങിയവര് പങ്കെടുത്തു.