ഐഎഫ്എഫ്കെ കഴിഞ്ഞപ്പോൾ സിനിമ കണ്ട പലരും അഭിനന്ദനങ്ങൾ അറിയിച്ചിരുന്നു. അവാർഡ് കിട്ടുമെന്നൊക്കെ പലരും മോഹിപ്പിച്ചിരുന്നു. ഫെസ്റ്റിവലുകളിലൊക്കെ പോകുമ്പോഴും പലരും അവാർഡ് പ്രതീക്ഷ പങ്കുവച്ചിരുന്നു. ഈ വാക്കുകൾ തന്നെയാണ് ഏറ്റവും വലി‍യ അവാർഡ് എന്നാണ് അവരോടൊക്കെ പറഞ്ഞത്. അതിനപ്പുറം അവാർഡ് മോഹിക്കാൻ എനിക്കു പേടിയാണ് തോന്നിയത്. പിന്നീട് വിഷമമായാലോ എന്നായിരുന്നു ചിന്ത.

ഈയടുത്ത് പരിചയമില്ലാത്ത പലരും ഫോണിൽ വിളിക്കുകയും, തടവിലെ നായിക മനസിനെ ഹോണ്ട് ചെയ്തുകൊണ്ടിരിക്കുന്നു എന്നെല്ലാം ഫെയ്സ്ബുക്ക് പോസ്റ്റുകൾ ഇടുകയും മറ്റും ചെയ്തിരുന്നു. അപ്പോഴൊക്കെ ഞാൻ അദ്ഭുതപ്പെടുകയായിരുന്നു. ഇനി അതെങ്ങാനും സംഭവിക്കുമോ എന്നൊക്കെ ആലോചിച്ചു. അങ്ങനെയിരിക്കെ, ഇന്ന് സ്കൂളിൽ ക്ലാസെടുത്തുകൊണ്ടിരിക്കെയാണ് അവാർഡ് പ്രഖ്യാപനം വന്നത്. വലിയ അദ്ഭുതമായി. കുട്ടികളൊക്കെ ആഘോഷത്തിലാണ്.

നാടകമാണ് എന്‍റെ മേഖല, പിന്നെ അധ്യാപനവും. തിയേറ്റർ ആർട്ടിസ്റ്റാണ്. മരുതൂർ സിയുപി സ്കൂളിൽ അധ്യാപികയുമാണ്. ഞാൻ പഠിച്ചതും ഇതേ സ്കൂളിലാണ്. ഇവിടെ ഒരു നാടക ഗ്രൂപ്പൊക്കെയുണ്ട്. എന്‍റെ ഹൈസ്കൂളിൽ ഇന്നു കൂടി ഒരു നാടകം ഏറ്റിരുന്നു. അതും ഒഴിവാക്കിയിട്ടില്ല. കുട്ടിക്കാലം മുതൽ നാടകത്തിലുണ്ട്. 30-35 വർഷമായി അമേച്വർ നാടകസംഘത്തിൽ സജീവമാണ്.

നാടകം തന്നെയാണ് എന്‍റെ മേഖല. പക്ഷേ, സിനിമയിൽ നല്ല ക്യാരക്റ്ററുകൾ കിട്ടിയാൽ ഇനിയും ചെയ്യും. മരുതൂർ ഗ്രാമത്തിന്‍റെ തന്നെ കഥയായിരുന്നു 'തടവ്'.