ഹൈദരാബാദ്: അല്ലു അർജുൻ നായകനാകുന്ന പുഷ്പ 2- ദി റൂൾ അടുത്ത വർഷം ഓഗസ്റ്റ് 15 ന് തിയെറ്ററുകളിലെത്തുമെന്ന് നിർമാതാക്കളായ മൈത്രി മൂവി മേക്കേഴ്സ് പ്രഖ്യാപിച്ചു. സുകുമാർ സംവിധാനം ചെയ്യുന്ന ചിത്രം പുഷ്പ 1 ദി റൈസ് എന്ന ചിത്രത്തിന്‍റെ രണ്ടാം ഭാഗമാണ്. പുഷ്പ- 1ലെ അഭിനയത്തിന് അല്ലു അർജുൻ മികച്ച നടനുള്ള ദേശീയ പുരസ്കാരം നേടിയതിനു പുറകേയാണ് ചിത്രത്തിന്‍റെ രണ്ടാം ഭാഗത്തിന്‍റെ റിലീസ് തിയതി പ്രഖ്യാപിച്ചിരിക്കുന്നത്.

ചിത്രത്തിലെ സംഗീതസംവിധാനത്തിന് ദേവി ശ്രീ പ്രസാദിനും ദേശീയ പുരസ്കാരം ലഭിച്ചിരുന്നു. അല്ലുവിന്‍റെ നാൽപ്പത്തൊന്നാം പിറന്നാൾ ദിനത്തിൽ ചിത്രത്തിന്‍റെ ഫസ്റ്റ്ലുക് പോസ്റ്റർ പുറത്തു വിട്ടിരുന്നു. രശ്മിക മന്ദാനയാണ് ചിത്രത്തിൽ നായികയായി എത്തുന്നത്. മലയാളികളുടെ പ്രിയപ്പെട്ട താരം ഫഹദ് ഫാസിൽ പ്രതിനായക വേഷത്തിലെത്തുന്നുവെന്നതും ശ്രദ്ധേയമാണ്.