ജെറോം മൈക്കിൾ
ആലുവ: ഓണ്ലൈനായി പാർട്ട് ടൈം ജോലി ചെയ്ത് വലിയ തോതിൽ പണമുണ്ടാക്കാം എന്ന പ്രചാരണത്തിലൂടെ വലിയ തട്ടിപ്പുകൾ നടക്കുന്നതായി വ്യക്തമാകുന്നു. ഇത്തരത്തിൽ 250 കോടി രൂപയോളം തട്ടിയ കേസില് രണ്ടു പേര് കൂടി പിടിയിലായതോടെയാണ് കൂടുതൽ വിവരങ്ങൾ പുറത്തുവരുന്നത്.
തമിഴ്നാട് ആമ്പൂര് സ്വദേശി രാജേഷ് (21), ബംഗലൂരു കുറുമ്പനഹള്ളി ചക്രധാര് (36) എന്നിവരെയാണ് എറണാകുളം റൂറല് സൈബര് ക്രൈം പൊലീസ് ബംഗളൂരുവില് നിന്ന് പിടികൂടിയത്. ബംഗളൂരു വിദ്യാര്ണപുര സ്വാഗത് ലേ ഔട്ട് ശ്രീ നിലയത്തില് മനോജ് ശ്രീനിവാസിനെ (33) നേരത്തെ അറസ്റ്റ് ചെയ്തിരുന്നു. മനോജിന്റെ സഹായിയാണ് ചക്രധര്.
പറവൂര് സ്വദേശികളായ സ്മിജയില് നിന്ന് ഏഴ് ലക്ഷത്തോളം രൂപയും, ബിനോയിയില് നിന്ന് പതിനൊന്ന് ലക്ഷത്തോളം രൂപയുമാണ് സംഘം തട്ടിയത്. സൈബര് പൊലീസ് നടത്തിയ പ്രാഥമിക പരിശോധനയിലാണ് അമ്പതോളം അക്കൗണ്ടുകളില് നിന്ന് 250 കോടിയുടെ തട്ടിപ്പ് നടത്തിയതായി വിവരം കിട്ടിയത്.
ഒണ്ലൈന് ടാസ്ക് വഴിയാണ് പറവൂര് സ്വദേശികള്ക്ക് പണം നഷ്ടമായത്. പാര്ട്ട് ടൈം ജോബിന്റെ ഭാഗമായി യൂ ട്യൂബ് ലൈക്ക് ചെയ്യുന്നത് വഴി വരുമാനം, ആയിരം രൂപ നിക്ഷേപിച്ചാല് വന് തുക വരുമാനം എന്നിങ്ങനെയായിരുന്നു ഇവര്ക്ക് ലഭിച്ച വാഗ്ദാനം. ആദ്യഘട്ടം എന്ന നിലയില് ചെറിയ തുകകള് തട്ടിപ്പുസംഘം പ്രതിഫലം, ലാഭം എന്നിങ്ങനെ പറഞ്ഞ് കൈമാറും. തുടര്ന്ന് വിശ്വാസം ജനിപ്പിച്ച ശേഷം വലിയ തുകകള് നിക്ഷേപിപ്പിക്കും. ഇതിന്റെ ലാഭം തിരികെ ലഭിക്കുന്നതിനായി ജിഎസ്ടി, മറ്റ് ടാക്സുകള് എന്നിങ്ങനെ കൂടുതല് തുകകള് വാങ്ങി കബളിപ്പിക്കുകയാണ് ചെയ്യുന്നത്. ഈ തട്ടിപ്പ് നടത്തുന്നതിനായി സാധാരണക്കാരെക്കൊണ്ട് കറന്റ് അക്കൗണ്ട് എടുപ്പിക്കുകയാണ് മനോജ് ചെയ്തിരുന്നത്. ഈ അക്കൗണ്ട് ഇവരറിയാതെ കൈകാര്യം ചെയ്യുന്നത് മനോജും സംഘവുമാണ്. പിടിക്കപ്പെട്ടാല് അന്വേഷണം തങ്ങളിലേക്ക് എത്താതിരിക്കാനാണ് സംഘം ഇങ്ങനെ ചെയ്യുന്നത്. ഇതിലേക്കാണ് ജോലി വാഗ്ദാനം ചെയ്ത് പറ്റിക്കപ്പെടുന്നവര് പണം നിക്ഷേപിക്കുന്നത്.
ഒരു ദിവസം ആയിരത്തിലേറെ പണമിടപാട് ഒരു അക്കൗണ്ട് വഴി മാത്രം നടന്നിട്ടുണ്ട്.
ദുബൈയില് ജോലി ചെയ്യുന്ന കെവിന്, ജെയ്സന് എന്നിങ്ങനെ രണ്ടു പേരെ സമൂഹ മാധ്യമം വഴി പരിചയപ്പെട്ടുവെന്നും, അവര് പങ്കാളികളായിട്ടാണ് തട്ടിപ്പ് ആരംഭിച്ചതെന്നുമാണ് പ്രതി പറഞ്ഞത്. എന്നാല് പൊലീസിന്റെ അന്വേഷണത്തില് ഈ പേരുകളും അക്കൗണ്ടും വ്യാജമാണെന്നും ചൈനയില് നിന്നും ഓപ്പറേറ്റ് ചെയ്യുന്നതെന്നുമാണ് മനസിലാകുന്നത്. അക്കൗണ്ട് വഴി ലഭിക്കുന്ന തുക ക്രിപ്റ്റോ കറന്സിയാക്കി വിദേശത്തെത്തിക്കുകയാണ് പതിവ്. ചക്രധാര് ആണ് ആളുകളെക്കൊണ്ട് അക്കൗണ്ട് എടുപ്പിക്കുന്നത്. പ്രാഥമിക വിദ്യാഭ്യാസം പോലുമില്ലാത്ത ആളുകളെയാണ് ഇതിന് തെരഞ്ഞെടുക്കുന്നത്. അക്കൗണ്ടില് തുക വരുന്നതും പോകുന്നതും ഇവര് അറിയാറില്ല. ഇയാളുടെ പരിചയക്കാരനാണ് രാജേഷ്. ഇയാളുടെ അക്കൗണ്ട് വഴി രണ്ട് ദിവസം കൊണ്ട് മാത്രം പത്ത് കോടിയിലേറെ രൂപയുടെ ഇടപാടാണ് നടന്നിട്ടുള്ളത്.
എറണാകുളം റൂറല് ജില്ലാ പൊലീസ് മേധാവി ഡോ. വൈഭവ് സക്സേനയുടെ നേതൃത്വത്തില് സൈബര് പൊലീസ് സ്റ്റേഷന് ഇന്സ്പെക്റ്റര് എം.ബി. ലത്തീഫ്, എസ്ഐ റെനില് വര്ഗീസ്, സീനിയര് സിപിഒ മാരായ ലിജോ ജോസ്, ജെറി കുര്യാക്കോസ്, ഷിറാസ് അമീന്, ഐനിഷ് സാബു, എം.എസ്. സിജു. എന്നിവരാണ് അന്വേഷണ സംഘത്തിലുണ്ടായിരുന്നത്. പ്രതികളെ കോടതിയില് ഹാജരാക്കി റിമാൻഡ് ചെയ്തിരിക്കുകയാണ്.