തിരുവനന്തപുരം: നവകേരള സദസിൽ പങ്കെടുക്കാത്തതിന്‍റെ പേരിൽ ഓട്ടോറിക്ഷ തൊഴിലാളിയായ യുവതിയെ തൊഴിലെടുക്കാൻ സമ്മതിക്കുന്നില്ലെന്ന് പരാതി. കാട്ടായിക്കോണം മങ്ങാട്ടുക്കോണം സ്വദേശിനിയായ രജിനിയെയാണ് തൊഴിലെടുക്കാൻ സമ്മതിക്കാത്തത്.

കഴിഞ്ഞ എട്ടുവർഷമായി കാട്ടായികോണം സ്റ്റാൻഡിലാണ് രജനി ഓട്ടോറിക്ഷ ഓടിക്കുന്നത്. ഞായറാഴ്ച രാവിലെ പതിവുപോലെ ഓട്ടോയുമായെത്തിയ രജിനിയെ സിപിഎം-സിഐടിയു പ്രവർത്തകരാണ് തടഞ്ഞത്. നവകേരള സദസിന് വരണമെന്നുള്ള നിർദേശം പാലിച്ചെന്ന് ആരോപിച്ചാണ് തടഞ്ഞതെന്ന് രജനി ആരോപിച്ചു. കേസുമായി മുന്നോട്ടു പോയാൽ ചുമട്ടുത്തൊഴിലാളിയായ സഹോദരൻ രാജേഷിനെ നാളെമുതൽ ജോലിക്ക് കയറ്റില്ലെന്ന് ഭീഷണിപ്പെടുത്തിയെന്നും ആരോപണമുണ്ട്. ഇതുമായി ബന്ധപ്പെട്ട് പ്രവർത്തകർ ഭീഷണിപ്പെടുത്തുന്ന ദൃശങ്ങളും രജിനി പുറത്തുവിട്ടു.