തിരുവനന്തപുരം: പുതുപ്പള്ളിയിലെ ഉപതെരഞ്ഞെടുപ്പിൽ എതിർ സ്ഥാനാർഥികളെ നിർത്താതിരിക്കാനുള്ള ഔന്നത്യം എതിർപാർട്ടികൾ കാണിക്കണമെന്ന സുധാകരന്‍റെ പ്രസ്താവനയെ തള്ളി എൽഡിഎഫ് കൺവീനർ ഇ.പി. ജയരാജൻ. മത്സരരംഗത്ത് വ്യക്തികളല്ല, രാഷ്ട്രീയമാണ് പ്രധാനം. സുധാകരന്‍റെ പ്രസ്താവന അപക്വ രാഷ്ട്രീയമാണെന്നും ഇപി ആരോപിച്ചു.

എൽഡിഎഫ് സ്ഥാനാർഥിയെ നിർത്തരുതെന്ന് പറയാൻ സുധാകരന് അവകാശമില്ല. വ്യക്തികളെ മുൻനിർത്തി തെരഞ്ഞെടുപ്പിൽ മത്സരിക്കരുതെന്ന് പറയുന്നത് അരാഷ്ട്രീയമാണ്. ഇവിടെ വ്യക്തികളല്ല. രാഷ്ട്രീയമാണ്. ആദരവ് വേറെ, രാഷ്ട്രീയ മത്സരം വേറെയെന്നും ജയരാജൻ പറഞ്ഞു.