പാലക്കാട്: മഹാരാജാസ് കോളെജിലെ വ്യാജ പ്രവർത്തി പരിചയ സർട്ടിഫിക്കറ്റ് കേസിൽ അറസ്റ്റിലായ കെ. വിദ്യ ഒളിവിൽ കഴിഞ്ഞത് മുൻ എസ്എഫ്ഐ നേതാവ് റോവിത് കുട്ടോത്തിന്‍റെ വീട്ടിലാണെന്ന് വിവരം. വിദ്യയുടെ റിമാന്‍റ് റിപ്പോർട്ട് പുറത്തു വന്നിരുന്നു. അതിൽ പ്രതിയെ പിടികൂടിയത് വില്യാപ്പള്ളി രാഘവൻ എന്നയാളുടെ വീട്ടിൽ നിന്നാണെന്നാണ് പറയുന്നത്. രാഘവന്‍റെ മകനാണ് റോവിത് കുട്ടോത്ത്.
സിപിഎം സൈബർ പോരാളിയും കാലിക്കറ്റ് യൂണിവേഴ്സിറ്റിയിലെ മുൻ എസ്എഫ്ഐ പ്രവർത്തകനുമാണ് റോവിത്. സിപിഎം പ്രവർത്തകർ വഴിയാണ് വിദ്യ റോവിത്തിന്‍റെ വീട്ടിലെത്തിയതെന്നാണ് വിവരം. പ്രതിക്കെതിരെ സമാനമായ കേസ് വേറെയും രജിസ്റ്റർ ചെയ്തിട്ടുണ്ടെന്നും ഇതിൽ നിന്ന് പ്രതിയുടെ ക്രിമിനൽ പശ്ചാത്തലം വ്യക്തമാണെന്നും റിമാന്‍റ് റിപ്പോർട്ടിൽ പറയുന്നു.