കരുനാഗപ്പള്ളി: കരുനാഗപ്പള്ളിയിൽ നിന്നും കാണാതായ 20 കാരിയെ കണ്ടെത്തി. ആലപ്പാട് സ്വദേശി ഐശ്വര്യ അനിലിനെ തൃശൂരിലെ മുരിങ്ങൂര്‍ ഡിവൈന്‍ ധ്യാനകേന്ദ്രത്തില്‍ നിന്നാണ് കണ്ടെത്തിയത്.

സ്വകാര്യ എൻട്രൻസ് കോച്ചിങ് സ്ഥാപനത്തിലെ വിദ്യാർഥിയാണ് ഐശ്വര്യ അനിൽ. 18 ന് രാവിലെ വീട്ടിൽ നിന്നും ഇറങ്ങിയ ഐശ്വര്യ റെയിൽവേ സ്റ്റേഷനിലേക്ക് ഇരുചക്രവാഹനത്തിൽ പോവുന്നതിന്‍റെ സിസിടിവി ദൃശ്യങ്ങൾ പുറത്തു വന്നിരുന്നു. ഇതിന്റെ അടിസ്ഥാനത്തില്‍ നടത്തിയ അന്വേഷണത്തിലാണ് പൊലീസ് പെണ്‍കുട്ടിയെ കണ്ടെത്തിയത്. നിലവില്‍ തൃശൂരില്‍ പൊലീസിന്‍റെ സംരക്ഷണത്തിലാണ് ഐശ്വര്യയുള്ളത്.

ഈ മാസം 18 ന് രാവിലെ മുതലാണ് ഐശ്വര്യയെ കാണാതായത്. ഓൺലൈൻ ഗെയിം കളിച്ചതിനെ തുടർന്ന് തലേദിവസം വഴക്കു പറഞ്ഞിരുന്നതായി അമ്മ ഷീജ പൊലീസിനോട് പറഞ്ഞിരുന്നു. ഇക്കാരണത്താൽ പിണങ്ങിപ്പോയതാവാം പെൺകുട്ടിയെന്നാണ് സൂചന. 18 ന് രാവിലെ 11 മണിയോടെയാണ് ഐശ്വര്യയുടെ ഫോൺ സ്വിച്ച് ഓഫായിരിക്കുന്നത്. ഒരു സ്കൂട്ടർ യാത്രികയോട് ലിഫ്റ്റ് ചോദിച്ചാണ് ഐശ്വര്യ റെയിൽവേ സ്റ്റേഷനിലേക്ക് പോയിരിക്കുന്നതെന്നത് ദൃശ്യങ്ങളിൽ നിന്നും പൊലീസ് സ്വിരീകരിച്ചിരുന്നു.