തിരുവനന്തപുരം: തദ്ദേശ റോഡ് പുനരുദ്ധാരണം ചര്‍ച്ച ചെയ്യാന്‍ മുഖ്യമന്ത്രി പിണറായി വിജയന്‍റെ അധ്യക്ഷതയില്‍ യോഗം ചേര്‍ന്നു. പൊതുമാനദണ്ഡം അനുസരിച്ച് എംഎൽഎമാർ നിർദേശിക്കുന്ന പ്രവൃത്തികൾ സർക്കാരിൽ സമർപ്പിക്കാന്‍ മുഖ്യമന്ത്രി നിര്‍ദ്ദേശിച്ചു. ധനകാര്യ വകുപ്പ് ഇവ മുൻഗണന ക്രമത്തിൽ ക്രമീകരിച്ച് തദ്ദേശ സ്വയംഭരണ വകുപ്പിന് കൈമാറും. ഇതനുസരിച്ച് തദ്ദേശ സ്വയംഭരണ വകുപ്പ് ഭരണാനുമതി പുറപ്പെടുവിക്കണം.
പ്രധാന റോഡുകൾ, സ്‌കൂൾ, കോളെജ്, ആശുപത്രി, ടൂറിസം മേഖലകൾ മുതലായവയെ ബന്ധിപ്പിക്കുന്ന തദ്ദേശ റോഡുകൾ, ജൽജീവൻ മിഷൻ പ്രവൃത്തികളുടെ ഭാഗമായി കുഴിക്കേണ്ടി വന്നതും പൂർവസ്ഥിതിയിലാക്കാൻ സാധിക്കാത്തതുമായ റോഡുകൾ എന്നിവയ്ക്ക് മുൻഗണന നൽകും. നേരത്തെ നടപ്പിലാക്കിയ മുഖ്യമന്ത്രിയുടെ ഗ്രാമീണ റോഡ് പുനരുദ്ധാരണ പദ്ധതിയുടെ മാർഗരേഖ കാലികമായ മാറ്റങ്ങളോടെ പ്രയോജനപ്പെടുത്തും.
ഗുണനിലവാര പരിശോധനക്കായി ജില്ലാ പഞ്ചായത്ത് എക്‌സിക്യൂട്ടീവ് എഞ്ചിനീയറുടെ നേത്യത്വത്തിൽ ജില്ലാതല സാങ്കേതിക സമിതി രൂപീകരിക്കും. പ്രവൃത്തികൾ സംബന്ധിച്ച വിശദാംശങ്ങൾ എം.എൽ.എമാർ 2024 നവംബർ 30നകം സമർപ്പിക്കണം. തെരഞ്ഞെടുക്കപ്പെടുന്ന റോഡുകളുടെ പേര്, നീളം, വീതി എന്നിവ തദ്ദേശ സ്വയംഭരണ സ്ഥാപനങ്ങളുടെ ആസ്‌തി പട്ടികയിൽ ഉൾപ്പെട്ടവയാകണമെന്ന് എംഎൽഎമാർ ഉറപ്പാക്കണം. ജില്ലാ പഞ്ചായത്ത്-ബ്ലോക്ക് പഞ്ചായത്ത് -ഗ്രാമ പഞ്ചായത്ത്-നഗരസഭ-കോർപ്പറേഷൻ അറ്റകുറ്റപ്പണികൾക്കോ പുനരുദ്ധാരണത്തിനോ ഫണ്ട് അനുവദിച്ച റോഡുകൾ പട്ടികയിൽ ഉൾപ്പെടുന്നില്ലെന്ന് ഉറപ്പാക്കാണം.
അറ്റകുറ്റപ്പണികൾ, ഭാഗിക പ്രവൃത്തികൾ എന്നിവ അടുത്ത കാലത്ത് നടപ്പിലാക്കിയ റോഡുകൾ പരിഗണിക്കുന്ന പക്ഷം ബാധ്യത കാലയളവിൽ (ഡിഫക്‌ട് ലയബിലിറ്റി പിരിയഡ്) ഉൾപ്പെട്ടിട്ടില്ലെന്ന് ഉറപ്പാക്കണം. നടപടിക്രമങ്ങൾ പൂർത്തീകരിച്ച് 2024 ഡിസംബർ 20 നകം തദ്ദേശസ്വയംഭരണ വകുപ്പ് ഭരണാനുമതി പുറപ്പെടുവിക്കണം. പദ്ധതിയിൽ ഉൾപ്പെട്ട മുഴുവൻ റോഡുകളുടെയും പുനരുദ്ധാരണ പ്രവൃത്തികൾ 2025 ഏപ്രിലില്‍ പൂര്‍ത്തീകരിക്കണമെന്ന് മുഖ്യമന്ത്രി നിർദ്ദേശിച്ചു. എംഎൽഎമാരിൽ നിന്ന് ലഭിച്ച നിർദ്ദേശങ്ങൾ ക്രോഡീകരിക്കുന്നത് മുതൽ പുനരുദ്ധാരണ പ്രവൃത്തികൾ പൂർത്തികരിക്കുന്നതുവരെയുള്ള ഓരോ ഘട്ടവും സൂക്ഷ്മമായി മോണിറ്ററിങ് നടത്തുന്നതിന് പോർട്ടൽ സജ്ജമാക്കും.
നിശ്ചയിക്കപ്പെട്ട തീയതികളിൽ പോർട്ടലിലെ വിവരങ്ങളുടെ അടിസ്ഥാനത്തിൽ പുരോഗതി അവലോകനം ചെയ്യും. പ്രവൃത്തികൾക്ക് കുറഞ്ഞ ബാധ്യത കാലയളവ് രണ്ട് വർഷമായി നിജപ്പെടുത്തും. യോഗത്തില്‍ ധനമന്ത്രി കെ.എന്‍. ബാലഗോപാല്‍, തദ്ദേശസ്വയംഭരണ വകുപ്പ് മന്ത്രി എം.ബി. രാജേഷ്, ചീഫ് സെക്രട്ടറി ശാരദ മുരളീധരന്‍ തുടങ്ങിയവര്‍ പങ്കെടുത്തു.