മുംബൈ: പ്രമുഖ സാമൂഹ്യ സാംസ്‌കാരിക സംഘടനയായ 'പ്രതീക്ഷ ഫൗണ്ടേഷ'ൻ്റെ ഒരുവർഷം നീണ്ടുനിൽക്കുന്ന രജതജൂബിലി ആഘോഷങ്ങൾക്ക് സെപ്തംബർ -29 ന് തിരശീല ഉയരും. വസായ് അയ്യപ്പക്ഷേത്രം ഓഡിറ്റോറിയത്തിൽ വെച്ചുനടക്കുന്ന ചടങ്ങിൽ ബഹുമാനപ്പെട്ട മഹാരാഷ്ട്ര ഗവർണർ സി.പി. രാധാകൃഷ്ണൻ മുഖ്യാതിഥി ആയിരിക്കും. ബിജെപി നേതാവ് പി.കെ. കൃഷ്ണദാസ് സിനിമാതാരം ശങ്കർ തുടങ്ങിയവർ വിശിഷ്ടാതിഥികളായി പങ്കെടുക്കും. സാമൂഹ്യ സാംസ്‌കാരിക രാഷ്ട്രീയരംഗത്തെ പ്രമുഖർ പരിപാടിയിൽ സന്നിഹിതരായിരിക്കും.
വിവിധ മേഖലയിൽ കഴിവ് തെളിയിച്ചവർക്കുള്ള 2024 ലെ പ്രതീക്ഷ ഫൗണ്ടേഷൻ പുരസ്‌കാരങ്ങളുടെ സമർപ്പണവും ചടങ്ങിൽ നടക്കുമെന്ന് ഫൗണ്ടേഷൻ ചെയർമാൻ കെ.ബി. ഉത്തംകുമാർ അറിയിച്ചു. കലാപരിപാടികളും ഓണസദ്യയും ഉണ്ടായിരിക്കും. പരിപാടിയുടെ നടത്തിപ്പിനായി വിപുലമായ സ്വാഗത സംഘം പ്രവർത്തിച്ചുവരുന്നുണ്ട്.