ന്യൂഡല്‍ഹി: വനിതാ ഗുസ്തി താരങ്ങള്‍ നല്‍കിയ ലൈംഗികാതിക്രമ കേസില്‍ ബിജെപി എംപിയും ഗുസ്തി ഫെഡറേഷന്‍ ഒഫ് ഇന്ത്യ പ്രസിഡന്‍റുമായ ബ്രിജ് ഭൂഷണ് ശരണ്‍ സിങ്ങിന് കോടതി സമന്‍സ്. ജൂലൈ 18ന് കോടതിയിൽ നേരിട്ട് ഹാജരാകാന്‍ ആവശ്യപ്പെട്ടു കൊണ്ട് ഡല്‍ഹി റോസ് അവന്യൂ കോടതിയാണു സമന്‍സ് നല്‍കിയിരിക്കുന്നത്. ഗുസ്തി ഫെഡറേഷന്‍ അസിസ്റ്റന്‍റ് സെക്രട്ടറി വിനോദ് തോമറിനോടും ഹാജരാകാന്‍ കോടതി നിര്‍ദേശിച്ചിട്ടുണ്ട്.
ആരോപണങ്ങള്‍ ഉയര്‍ന്നതിനെ തുടര്‍ന്ന് വിനോദ് തോമറിനെ അസിസ്റ്റന്‍റ് സെക്രട്ടറി സ്ഥാനത്ത് നിന്നു നേരത്തെ സസ്‌പെന്‍ഡ് ചെയ്തിരുന്നു. റോസ് അവന്യൂ കോടതി അഡീഷണല്‍ ചീഫ് മെട്രൊപൊളിറ്റന് മജിസ്‌ട്രേറ്റ് ഹര്‍ജിത് സിങ് ജസ്പാലാണു 2 പേര്‍ക്കും സമന്‍സയച്ചത്. പ്രതികള്‍ക്കെതിരെ നടപടിയെടുക്കാന്‍ മതിയായ തെളിവുകളുണ്ടെന്നും കോടതി വ്യക്തമാക്കി.