ബത്തേരി: കോൺഗ്രസ് നേതാവ് രാഹുൽ ഗാന്ധിയെ സ്വീകരിക്കാനെത്തിയ എംഎൽഎമാരെ തടഞ്ഞ തമിഴ്നാട് പൊലീസിനെച്ചൊല്ലി സംഘർഷം. എംഎൽഎമാരായ ഐ.സി ബാലകൃഷ്ണനെയും ടി.സിദ്ദിഖിനെയുമാണ് തമിഴ്നാട് പൊലീസ് തടഞ്ഞത്. ചെന്നൈയിൽ നിന്നെത്തിയ ഉദ്യോഗസ്ഥനാണു തടഞ്ഞതെന്നു കരുതുന്നുവെന്ന് ഐ.സി ബാലകൃഷ്ണൻ പറഞ്ഞു.
രാവിലെയാണ് മൈസൂരിൽനിന്നു ഹെലികോപ്റ്ററിൽ ബത്തേരിയുടെ അതിർത്തിപ്രദേശമായ താളൂർ നീലഗിരി കോളെജ് ഗ്രൗണ്ടിൽ രാഹുൽ എത്തിയത്. രാഹുലിനെ സ്വീകരിക്കാനെത്തിയ എംഎൽഎമാർ കോളെജ് ഗേറ്റ് കഴിഞ്ഞ് രണ്ടാമത്തെ ഗേറ്റിനടുത്തെത്തിയപ്പോൾ പൊലീസ് തടയുകയായിരുന്നു. വളരെ മോശമായാണ് ഉദ്യോഗസ്ഥർ പൊരുമാറിയതെന്നും ലോക്കൽ പൊലീസ് ഈ ഉദ്യോഗസ്ഥനോട് എംഎൽഎമാരാണെന്ന് പറഞ്ഞിട്ടും അപമര്യാദയായി പെരുമാറുമാറിയെന്നും അദ്ദേഹം വ്യക്തമാക്കി. സംഭവത്തിൽ മുഖ്യമന്ത്രിക്ക് പരാതി നൽകുന്നത് പരിഗണനയിലുണ്ടെന്നും പാർട്ടിയുമായി ആലോചിച്ചശേഷം നടപടിയെടുക്കുമെന്ന് ഐ.സി ബാലകൃഷ്ണൻ പറഞ്ഞു.