ദുബായ്: ദുബായിലെ വിസ സേവനങ്ങളും യാത്രാ സംവിധാനങ്ങളും പരിചയപ്പെടുത്തുന്നതിന് ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്‌സ്( ജിഡിആർഎഫ്എ ) ദുബായ് മാളിൽ പ്രത്യേക പ്രദർശനം സംഘടിപ്പിച്ചു.
'നിങ്ങൾക്കായി ഞങ്ങൾ ഇവിടെയുണ്ട്' എന്ന പ്രമേയത്തിലാണ് പ്രദർശനം നടത്തിയത്. പരിപാടിയിൽ അധികൃതർ ഉപയോക്താക്കളുമായി നേരിട്ട് സംവദിക്കുകയും, അവർക്ക് വിവിധ സേവനങ്ങളെക്കുറിച്ച് വിശദമായി പരിചയപ്പെടുത്തുകയും ചെയ്തു.
ദുബായിലെ വിവിധ സ്ഥലങ്ങളിൽ മുമ്പ് നടത്തിയ പ്രദർശനങ്ങളുടെ തുടർച്ചയാണ് ദുബായ് മാളിലെയും പ്രദർശനം. വിസ സേവനങ്ങളുടെ പ്രാപ്യതയും സേവന ഉപയോക്താക്കൾക്ക് എളുപ്പത്തിൽ ഇവ എങ്ങനെ ലഭ്യമാക്കാമെന്നും ബോധവൽക്കരിക്കുക എന്നതാണ് ഈ പ്രദർശനത്തിന്‍റെ പ്രധാന ലക്ഷ്യം.
പവലിയനിൽ ഗോൾഡൻ വിസ, പ്രവേശനാനുമതി, എമിറേറ്റ്സ് ഐഡി, പ്രവാസികൾക്കുള്ള താമസ കുടിയേറ്റ നിയമോപദേശം, യുഎഇ സ്വദേശികൾക്കുള്ള സേവനങ്ങൾ, കുട്ടികളുടെ പാസ്‌പോർട്ട് പ്ലാറ്റ്ഫോം തുടങ്ങിയ വിവിധ സേവനങ്ങളുടെ വിശദവിവരങ്ങൾ ഉൾപ്പെടുത്തിയിരുന്നു.
കൂടാതെ, ഉപയോക്താക്കളുടെ അനുഭവം മെച്ചപ്പെടുത്തുന്നതിനായി രൂപകൽപ്പന ചെയ്ത നൂതന പ്ലാറ്റ്‌ഫോമായ '04' സേവനത്തെക്കുറിച്ചുള്ള വിശദാംശങ്ങളും അവതരിപ്പിച്ചു.
പ്രദർശന പവലിയൻ ജിഡിആർഎഫ്എയുടെ ഇൻസ്റ്റിറ്റ‍്യൂഷണൽ സപ്പോർട്ട് അസിസ്റ്റന്‍റ് ഡയറക്ടർ ബ്രിഗേഡിയർ അബ്ദുസമദ് ഹുസൈൻ സുലൈമാൻ സന്ദർശിച്ചു. ജിഡിആർഎഫ്എയുടെ സാമൂഹ്യ ബന്ധം മെച്ചപ്പെടുത്തുന്നതിനുള്ള ഈ കാമ്പെയിൻ ഉപയോക്താക്കൾക്ക് ലഭ്യമാകുന്ന സേവനങ്ങളെ കുറിച്ച് ബോധവൽക്കരിക്കാൻ മികച്ച ഒരു മാർഗമാണെന്ന് അദേഹം അഭിപ്രായപ്പെട്ടു.