യുഎസ് ദേശീയ ഭീകരവിരുദ്ധ കേന്ദ്രത്തിന്‍റെ തലവൻ ബ്രെറ്റ് ഹോംഗ്രെൻ ആണ് നിർണായക വെളിപ്പെടുത്തൽ നടത്തിയത്. ഇസ്ലാമിക് സ്റ്റേറ്റ് ഭീകരർ ആഫ്രിക്കയെ അതിന്‍റെ പുതിയ അതിർത്തിയായി പരിഗണിച്ചിരിക്കുകയാണെന്നും ആഫ്രിക്കയിലെ തീവ്രവാദ പ്രവർത്തനങ്ങൾ അമെരിക്കയ്ക്ക് കൂടുതൽ അപകടകരമാണെന്നും യുഎസിന്‍റെ ഉന്നത ഭീകര വിരുദ്ധ ഉദ്യോഗസ്ഥൻ മുന്നറിയിപ്പു നൽകുന്നു. ആഫ്രിക്കയിലെ ഐസിസ് ഭീഷണി യുഎസിന്‍റെ നയങ്ങൾക്കെതിരെയുള്ള ദീർഘകാല ഭീഷണിയാണെന്ന് അദ്ദേഹം പറഞ്ഞു.
ഇന്ന് ഐഎസ്ഐഎസിന്‍റെ ഏറ്റവും വലിയ ഫലഭൂയിഷ്ഠമായ മണ്ണ് ആണ് ആഫ്രിക്ക. മുമ്പും ആഫ്രിക്കയിൽ ഐഎസ്ഐഎസിന്‍റെ പ്രവർത്തനം ശക്തമായിരുന്നു. എങ്കിലും മുമ്പൊന്നും അമെരിക്കൻ തീവ്രവാദ വിരുദ്ധ സേനാത്തലവന്മാർ അത് കണക്കിലെടുത്തിരുന്നില്ല. വളരെ അപൂർവമായി മാത്രമേ മിക്ക ഉന്നത അമെരിക്കൻ അഡ്മിനിസ്ട്രേറ്റീവ് ഉദ്യോഗസ്ഥർ അമെരിക്കയുടെ ദേശീയ സുരക്ഷയെ കുറിച്ചു പറയുമ്പോൾ ആഫ്രിക്കയിലെ ഐഎസ്ഐഎസിന്‍റെ വളർച്ചയെ കുറിച്ചു സൂചിപ്പിച്ചിരുന്നുള്ളു. ഭീകരതയ്ക്കെതിരെയുള്ള യുദ്ധം തുടരാൻ വാഷിങ്ടണിനു മുന്നറിയിപ്പാണ് ഹോംഗ്രൈയ്നിന്‍റെ ഈ വിലയിരുത്തൽ.
ഭീകരതയ്ക്കെതിരെയുള്ള യുദ്ധത്തിൽ ചൈനയ്ക്കെതിരെ മുന്നോട്ടു പോകാൻ അമെരിക്ക തയാറായാൽ പോലും ആജന്മ രാഷ്ട്രീയ ശത്രുവായ റഷ്യയുമായി ഒരു കൊമ്പു കോർക്കൽ പുടിന്‍റെ സുഹൃത്തായ ട്രംപ് ആഗ്രഹിക്കില്ല.അതു കൊണ്ടു തന്നെ റഷ്യ പാലൂട്ടി വളർത്തുന്ന ആഫ്രിക്കൻ ഐസിസിനെതിരെ അമെരിക്ക യുദ്ധത്തിനിറങ്ങുമോ എന്നത് കണ്ടറിയണം.
നിലവിൽ ആഫ്രിക്കയിലെ ഐഎസ്ഐഎസ് ശാഖകൾ അവരുടെ പ്രത്യയ ശാസ്ത്രം പ്രചരിപ്പിക്കുന്നതിലും കൂടുതൽ അധികാരം നേടുന്നതിലും ഇസ്ലാമിക് സ്റ്റേറ്റിന്‍റെ വിജയത്തിനായി പ്രാദേശിക സർക്കാരുകളെ അട്ടിമറിക്കുന്നതിനുമായി വംശീയവും സാമൂഹികവുമായ ഭിന്നതകളെ ചൂഷണം ചെയ്യുന്നതിലാണ് ശ്രദ്ധ കേന്ദ്രീകരിക്കുന്നത്.ഇപ്പോൾ ആഫ്രിക്കയെ സമ്പൂർണമായി ഇസ്ലാമിക് സ്റ്റേറ്റ് ആക്കുകയാണ് ഐസിസ് ലക്ഷ്യമിടുന്നതെങ്കിൽ സമീപ ഭാവിയിൽ അത് മറ്റു രാജ്യങ്ങളെയും ലക്ഷ്യമാക്കി വളർന്നേക്കാം എന്നും അദ്ദേഹം മുനനറിയിപ്പു നൽകി.
ആഫ്രിക്കയിലെഐഎസ്ഐഎസ് ഭീകരർ വിദേശ പോരാളികളെ കൊണ്ടു വരാനുള്ള സാധ്യത തള്ളിക്കളയാൻ ആകില്ലെന്നും അത് അമെരിക്കയ്ക്ക് തലവേദനയാകുമെന്നും അദ്ദേഹം പറയുന്നു.
ഇസ്ലാമിസ്റ്റ് തീവ്രവാദികൾ നൈജർ, ബുർക്കിന ഫാസോ, മാലി എന്നീ പ്രദേശങ്ങളിൽ അരാജകത്വം വിതയ്ക്കുകയും പടിഞ്ഞാറൻ ആഫ്രിക്കയുടെ തീരപ്രദേശങ്ങളിൽ തെക്കൻ പ്രദേശങ്ങളെ കൂടുതൽ ലക്ഷ്യം വച്ച് ആക്രമണങ്ങൾ നടത്തുകയും ചെയ്യുകയാണ് ഇപ്പോൾ.
മാലി ആസ്ഥാനമായി പ്രവർത്തിക്കുന്ന ജമാഅത്ത് നുസ്രത്ത് അൽ-ഇസ്ലാം വൽ മുസ്ലിമിൻ പോലുള്ള ഐഎസ്ഐഎസിന്‍റെയും അൽ ഖ്വയ്ദയുടെ അനുബന്ധ സംഘടനകളുടെയും ശാഖകൾ ഇതിൽ ഉൾപ്പെടുന്നു. നൈജീരിയയിലും ചാഡ് തടാകം, കോംഗോ, മൊസാംബിക്, സൊമാലിയ എന്നിവിടങ്ങളിലും ഐഎസിന് ശാഖകളുണ്ട് - ചിലത് നിലവിലുള്ള അൽ ഖ്വയ്‌ദയുമായി ബന്ധപ്പെട്ട ഗ്രൂപ്പുകളിൽ നിന്ന് വേർപിരിഞ്ഞ് ശാഖകളിൽ നിന്ന് രൂപപ്പെട്ടതാണ്.
മറ്റ് ചില തീവ്രവാദ വിരുദ്ധ ഉദ്യോഗസ്ഥർ പറയുന്നത്, സഹേലിൽ നിന്ന് ഉയർന്നുവരുന്ന ഭീകരാക്രമണ ഭീഷണികളിൽ ശ്രദ്ധ കേന്ദ്രീകരിക്കാൻ യുഎസ് തയാറാകണം എന്നാണ്. എന്നാൽ സഹേലിലെ ട്രംപിന്‍റെ ട്രാൻസിഷൻ ടീം തീവ്രവാദ വിരുദ്ധ മുൻഗണനകളെക്കുറിച്ചുള്ള ചോദ്യത്തോട് പ്രതികരിക്കാൻ വിസമ്മതിച്ചു.
വിദേശനയത്തെക്കുറിച്ചുള്ള മറ്റ് ചോദ്യങ്ങൾക്കുള്ള മറുപടിയിൽ ട്രംപ് “ലോകമെമ്പാടുമുള്ള ശക്തിയിലൂടെ സമാധാനം പുനഃസ്ഥാപിക്കുമെന്ന്” പറഞ്ഞു. തന്‍റെ ആദ്യ ടേമിൽ പ്രമുഖ ഫയർബ്രാൻഡ് യാഥാസ്ഥിതിക മാധ്യമ നിരൂപകനും മുൻ വൈറ്റ് ഹൗസ് ദേശീയ സുരക്ഷാ ഉദ്യോഗസ്ഥനുമായ സെബാസ്റ്റ്യൻ ഗോർക്ക അധികാരമേറ്റാൽ തീവ്രവാദ വിരുദ്ധ സീനിയർ ഡയറക്റ്ററായി പ്രവർത്തിക്കുമെന്ന് ട്രംപ് വെള്ളിയാഴ്ച പ്രഖ്യാപിച്ചു.
ഒരു ദശാബ്ദം മുമ്പാണ് ആഫ്രിക്കയിലെ സഹേൽ മേഖലയിൽ ഐഎസ്ഐഎസ് ഗ്രൂപ്പുകൾ കടന്നുകയറ്റം നടത്തിയത്.ഇറാഖിലും സിറിയയിലും 2013-ലും 2014-ലും നടത്തിയ ഐസിസ് ഭീകരാക്രമണ പരമ്പരകളെ ഓർമിപ്പിക്കും വിധമാണ് ഇപ്പോൾ ആഫ്രിക്കയിൽ ഐസിസിന്‍റെ ഭീകരപ്രവർത്തനങ്ങൾ എന്ന് ആഫ്രിക്കയിലെ ഐഎസ്ഐഎസ് മിഡിൽ ഈസ്റ്റ് ഇൻസ്റ്റിറ്റ്യൂട്ടിലെ തീവ്രവാദ വിരുദ്ധ വിദഗ്ധനായ ചാൾസ് ലിസ്റ്റർ പറഞ്ഞു.
ആഫ്രിക്കയിലെ സഹേൽ പ്രദേശം ഐസിസ് ഭീകരവാദികളുടെ താവളമായതോടെ ലോകത്തിലെഏറ്റവും അസ്ഥിരമായ സ്ഥലങ്ങളിലൊന്നായി മാറിയിരിക്കുന്നു. കഴിഞ്ഞ ചില വർഷങ്ങളിൽ മാലിയിലും നൈജറിലും പാശ്ചാത്യ ആഭിമുഖ്യമുള്ള സർക്കാരുകൾ വിജയിച്ചു വന്നപ്പോൾ അട്ടിമറിയിലൂടെ അവരിൽ നിന്നും അധികാരം പിടിച്ചെടുത്ത ജുണ്ടകൾ പടിഞ്ഞാറൻ രാജ്യങ്ങൾക്ക് ഉയർന്ന തിരിച്ചടിയാണ് നൽകിയത്. ഈ രാജ്യങ്ങളിലുണ്ടായിരുന്ന യുഎസ്,ഫ്രഞ്ച് സൈനികരെ ജുണ്ടകൾ പുറത്താക്കുകയും
പകരം അവരുടെ സർക്കാരുകളെ പിന്തുണയ്ക്കാൻ റഷ്യൻ-അനുയോജ്യമായ കൂലിപ്പടയാളികളെ കൊണ്ടുവരാൻ തീരുമാനിക്കുകയും ചെയ്തു. ഇതാണ് അമെരിക്കയെ ആശങ്കപ്പെടുത്തുന്നതായി അമെരിക്കൻ തീവ്രവാദ വിരുദ്ധ സ്ക്വാഡ് തലവൻ വ്യക്തമാക്കിയത്.