ധാക്ക: ബംഗ്ലാദേശിലെ ജെഷോറേശ്വരി കാളീക്ഷേത്രത്തിലെ കിരീടം പട്ടാപ്പകൽ മോഷ്ടിക്കപ്പെട്ടു. പ്രധാനമന്ത്രി നരേന്ദ്രമോദി സമർപ്പിച്ച കിരീടമാണ് മോഷണം പോയത്. മോഷണശ്രമം സിസിടിവിയിൽ പതിഞ്ഞിട്ടുണ്ട്. സത്കീരയിലെ ക്ഷേത്രത്തിൽ നിന്ന് പ്രധാന പൂജാരി മടങ്ങിയതിനു പിന്നാലെയാണ് സംഭവം. ഉച്ച കഴിഞ്ഞ് 2 മണിയോടെ ശ്രീകോവിലിൽ കയറിയ മോഷ്ടാവ് കിരീടം എടുത്ത് വസ്ത്രത്തിനുള്ളിൽ മറച്ച് ഇറങ്ങിപ്പോകുന്ന ദൃശ്യങ്ങൾ ക്യാമറയിൽ പതിഞ്ഞിട്ടുണ്ട്.

ക്ഷേത്രം വൃത്തിയാക്കാനെത്തിയ ജീവനക്കാരനാണ് കിരീടം നഷ്ടപ്പെട്ടതായി കണ്ടെത്തിയത്. സ്വർണവും വെള്ളിയും പൂശിയ കിരീടം വ്യാഴാഴ്ചയാണ് കാണാതായത്.

2021ലാണ് പ്രധാനമന്ത്രി നരേന്ദ്ര മോദി കീരീടം ക്ഷേത്രത്തിലേക്ക് സമർപ്പിച്ചത്. ജെഷോറേശ്വരി ക്ഷേത്രം 51 ശക്തിപീഠങ്ങളിൽ ഒന്നാണ്. നവരാത്രി ആഘോഷങ്ങൾക്കിടെയാണ് സംഭവം. അന്വേഷണം നടത്തി കിരീടം കണ്ടെത്തണമെന്ന് ഇന്ത്യ ആവശ്യപ്പെട്ടു.