ധർമാനന്ദ സാരംഗി, ഡയറക്റ്റർ ജനറൽ
(റോഡ് വികസനം) ആൻഡ് സ്പെഷ്യൽ സെക്രട്ടറി,
റോഡ് ഗതാഗത ആൻഡ് ഹൈവേ മന്ത്രാലയം
ബിദൂർ കാന്ത് ഝാ, ഡയറക്റ്റർ
(നവീന സാങ്കേതികവിദ്യ),
റോഡ് ഗതാഗത ആൻഡ് ഹൈവേ മന്ത്രാലയം
രാജ്യത്തിന്‍റെ ദീർഘകാല സാമൂഹ്യ-സാമ്പത്തിക വികസനത്തിനായി കരുത്തുറ്റതും സുസ്ഥിരവുമായ റോഡ് അടിസ്ഥാനസൗകര്യം കെട്ടിപ്പടുക്കേണ്ടത് അനിവാര്യമാണ്. സുരക്ഷ, ലോജിസ്റ്റിക് കാര്യക്ഷമത, ഉപയോക്തൃ സൗകര്യങ്ങൾ എന്നിവയ്‌ക്കൊപ്പം അതിവേഗ ഗതാഗത സൗകര്യമൊരുക്കുന്നതിനും റോഡ് അടിസ്ഥാനസൗകര്യം ആവശ്യമാണ്. മാത്രമല്ല, ഇതു ദീർഘകാലാടിസ്ഥാനത്തിൽ സുസ്ഥിരമാകുകയും വേണം. പരമ്പരാഗതമായി കല്ല്, ഫലഭൂയിഷ്ഠമായ മണ്ണ്, മണൽ തുടങ്ങിയ പ്രകൃതിവിഭവങ്ങളുടെ ശോഷണം, മരങ്ങൾ മുറിക്കൽ, ഹരിതഗൃഹവാതകങ്ങൾ പുറന്തള്ളൽ തുടങ്ങിയവയുമായി റോഡ് നിർമാണം ബന്ധപ്പെട്ടിരിക്കുന്നു. സുസ്ഥിരവികസനം കൈവരിക്കുന്നതിന് ഇത്തരം പ്രതിസന്ധികൾ പരിഹരിക്കേണ്ടത് അത്യാവശ്യമാണ്.
ഉദാഹരണം ചൂണ്ടിക്കാട്ടുകയാണെങ്കിൽ, ഒരു വരി- കി.മീ റോഡ് നിർമാണത്തിനു മികച്ച നിലവാരമുള്ള 20,000 ടൺ (ഏകദേശം) കല്ലുകൾ ആവശ്യമാണ്. കൂടാതെ, ദേശീയ പാതയുടെ ഓരോ വരി-കിലോമീറ്ററിന്‍റെയും നിർമാണം പ്രതിവർഷം 24-30 ടൺ വരെ കാർബൺ ഡൈ ഓക്സൈഡ് പുറന്തള്ളൽ സൃഷ്ടിക്കുന്നതായി കണക്കാക്കപ്പെടുന്നു. ഹരിതഭാവിക്കും നെറ്റ് സീറോയ്ക്കും വേണ്ടിയുള്ള കാഴ്ചപ്പാടുപ്രകാരം, 2070-ഓടെ ഇന്ത്യ “നെറ്റ് സീറോ”യിലെത്താനുള്ള ഉത്കൃഷ്ടമായ ലക്ഷ്യങ്ങൾ സ്ഥാപിച്ചിട്ടുണ്ട്. അതിനാൽ, പ്രകൃതിവിഭവങ്ങളുടെ പരിമിതമായ കരുതൽ ശേഖരം സംരക്ഷിക്കുന്നതിനും ഹരിതഗൃഹ വാതകങ്ങളുടെ പുറന്തള്ളൽ കുറയ്ക്കുന്നതിനും റോഡ് ഗതാഗത-ഹൈവേ മന്ത്രാലയം ഇനിപ്പറയുന്ന തത്വങ്ങൾ അടിസ്ഥാനമാക്കി ഹൈവേകളുടെ ആസൂത്രണം, രൂപകൽപ്പന, നിർമാണം, അറ്റകുറ്റപ്പണികൾ എന്നിവയ്ക്കു പദ്ധതിയിടുന്നു:
പുതിയ സാമഗ്രികൾ, പ്രക്രിയകൾ, സാങ്കേതികവിദ്യ എന്നിവ ഉപയോഗിച്ചുള്ള രൂപകൽപ്പനയുടെ ഫലപ്രദമായ വിനിയോഗം സാമഗ്രികൾ ലാഭിക്കൽ, ദീർഘായുസ്സ്, വേഗമേറിയ നിർമാണം മുതലായവയ്ക്കു കാരണമാകുന്നു.
* പ്രകൃതിവിഭവങ്ങളുടെ ഉപഭോഗം പരമാവധി കുറയ്ക്കൽ
* പ്രാദേശികമായി ലഭ്യമായ സാമഗ്രികളിൽ ശ്രദ്ധ കേന്ദ്രീകരിക്കൽ
* പരിസ്ഥിതിസൗഹൃദ ബദൽസാമഗ്രികളുടെ ഉപയോഗം
* പാഴ്‌വസ്തുക്കളുടെ ഉപയോഗം കുറയ്ക്കലും പുനരുപയോഗവും പുനഃചംക്രമണവും
* ജലം, മണ്ണ്, സസ്യജന്തുജാലങ്ങൾ മുതലായവയുടെ സംരക്ഷണം.
* ഹരിത നിർമാണരീതികൾ സ്വീകരിക്കൽ
* കാര്യക്ഷമവും പരിസ്ഥിതിസൗഹൃദവുമായ നിർമാണ ഉപകരണങ്ങളുടെയും യന്ത്രസാമഗ്രികളുടെയും ഉപയോഗം
* ഊർജസംരക്ഷണം
* ഭൂസൗന്ദര്യവൽക്കരണവും തൈകൾ നടലും
* ഹരിതഗൃഹവാതകങ്ങൾ പുറന്തള്ളൽ, ജലമലിനീകരണം, അന്തരീക്ഷത്തിലെ ശബ്ദനില, മണ്ണൊലിപ്പ്, മലിനീകരണം എന്നിവ തടയലും നിയന്ത്രിക്കലും
* അസ്ഥിര-ഖര- ദ്രവമാലിന്യങ്ങൾ കൈകാര്യം ചെയ്യലും നിർമാർജനവും
* ജീവിതചക്രത്തിന്‍റെ ചെലവ് അടിസ്ഥാനമാക്കിയുള്ള വിലയിരുത്തൽ
സുസ്ഥിര വികസനം കൊണ്ടുവരുന്നതിനായി വിവിധ ദേശീയ പാത പദ്ധതികളിലെ അത്തരം സാമഗ്രികൾ, സാങ്കേതികവിദ്യ, പ്രക്രിയകൾ എന്നിവയുടെ ഉപയോഗത്തിലെ ചില സുപ്രധാന നേട്ടങ്ങൾ ഇനിപ്പറയുന്ന രീതിയിൽ സംഗ്രഹിക്കാം:
ദൈർഘ്യമേറിയ പാലത്തിനായി അൾട്രാ-ഹൈ പെർഫോമൻസ് ഫൈബർ റീഇൻഫോഴ്സ്ഡ് കോൺക്രീറ്റ് ഉപയോഗിച്ച് നിർമിച്ച/ നിർമാണത്തിലിരിക്കുന്ന പാലങ്ങൾ (65).
സംസ്കരിച്ച സ്റ്റീൽ സ്ലാഗ് (2.6 ദശലക്ഷം മെട്രിക് ടൺ ഉപയോഗിച്ചു)
ബിറ്റുമിനസ് മിശ്രിതങ്ങളിലുള്ള പ്ലാസ്റ്റിക് മാലിന്യങ്ങൾ (2830 കിലോമീറ്റർ റോഡ് നിർമിച്ചു)
മുനിസിപ്പൽ ലാൻഡ്ഫില്ലിന്‍റെ നിഷ്ക്രിയ വസ്തുക്കൾ (2.4 ദശലക്ഷം മെട്രിക് ടൺ ഉപയോഗിച്ചു)
മുളകൊണ്ടുള്ള ക്രാഷ് ബാരിയർ (8.5 കി.മീ.)
പിഴുതെടുത്ത മരങ്ങൾ മാറ്റിനടൽ (70,000)
മണ്ണിന്‍റെ സ്ഥിരത, പ്രീകാസ്റ്റ് കോൺക്രീറ്റ് ഘടകങ്ങൾ, ഉയർന്ന പ്രവർത്തനക്ഷമതയുള്ള ബിറ്റുമിനസ് മിശ്രിതങ്ങൾ, വിവിധ തരം ജിയോസിന്തറ്റിക്സ്, കയർ/ചണം പോലുള്ള പ്രകൃതിദത്ത പായകൾ, നിലവിലുള്ള ബിറ്റുമിനസ് നടപ്പാതകളുടെ പുനരുപയോഗം, പൂർണതോതിലുള്ള പുനരുദ്ധാരണം, തുരങ്ക-മണ്ണിടിച്ചിൽ സാമഗ്രികളുടെ പുനരുപയോഗം, കെട്ടിട നിർമാണ-പൊളിക്കൽ മാലിന്യങ്ങളുടെ ഉപയോഗം, ബയോ-ബിറ്റുമിൻ, ഉറപ്പിച്ച കോൺക്രീറ്റിനായി സ്റ്റീൽ ബാറുകൾക്ക് പകരം ഫൈബർ റീഇൻഫോഴ്സ്ഡ് പോളിമർ റീബാറുകൾ മുതലായവ വ്യത്യസ്ത ദേശീയ പാത പദ്ധതികളിൽ വ്യത്യസ്ത അളവിൽ ഉപയോഗിക്കുന്നു.
സാധാരണഗതിയിൽ, എൻഎച്ച്എഐ വികസിപ്പിച്ച 135 കിലോമീറ്റർ നീളമുള്ള കിഴക്കൻ പ്രാന്ത അതിവേഗപാതാ ഹരിത ഹൈവേ പദ്ധതിയുടെ മാതൃകയായി ഇതു കണക്കാക്കാം. കാരണം ഇതു കാർബൺ പാദമുദ്രകൾ പലവിധത്തിൽ കുറയ്ക്കുന്നു:
* സൗരോർജ ഉൽപ്പാദനം: 4 മെഗാവാട്ട് ശേഷി
* ചെടികൾക്കുള്ള തുള്ളി സംവിധാനം
* ഓരോ 500 മീറ്ററിലും മഴവെള്ള സംഭരണ സംവിധാനം
* ഏകദേശം 12 ദശലക്ഷം ഫ്ലൈ ആഷ് ഉപയോഗിച്ചു.
* വിപുലമായ തൈ നടൽ: 2.6 ലക്ഷം മരങ്ങൾ നട്ടു
ലോക ബാങ്കിന്‍റെ സഹായത്തോടെ നടപ്പാക്കുന്ന ഹരിത ദേശീയ പാത ഇടനാഴി പദ്ധതികൾ (GNHCP) സുസ്ഥിര സാങ്കേതികവിദ്യകളുടെ ഉപയോഗത്തിന്‍റെ മറ്റൊരു ഉദാഹരണമാണ്. മൊത്തം 783 കിലോമീറ്റർ ദൈർഘ്യമുള്ള 23 നിർമാണ പാക്കേജുകൾ ഉൾപ്പെടുന്ന ദേശീയ പാതകളുടെ ഏഴു ഭാഗങ്ങൾ GNHCP-യുടെ കീഴിൽ ഏറ്റെടുത്തു. കയർ/ചണപ്പായ, ഹൈഡ്രോസീഡിങ്, ഗ്രീൻ സ്ട്രിപ്പുള്ള പരസ്പരബന്ധിത ചങ്ങലക്കണ്ണികൾ, മുളത്തോട്ടങ്ങൾ, രാമച്ചം, ഹെഡ്ജ് ബ്രഷ് ലെയറിങ്, പുനഃചംക്രമണം തുടങ്ങിയ ഹരിത വസ്തുക്കൾ/ സാങ്കേതിക വിദ്യകൾ ഈ പദ്ധതിയിൽ ഉപയോഗിക്കുന്നു.
കാർബൺ മുദ്രകൾ, കരുത്ത്, ഈട്, സേവനക്ഷമത എന്നിവയുടെ അടിസ്ഥാനത്തിൽ അത്തരം സാമഗ്രികളുടെയും സാങ്കേതിക നടപടികളുടെയും പ്രകടനം വിലയിരുത്താൻ റോഡ് ഗതാഗത-ഹൈവേ മന്ത്രാലയം തുടർച്ചയായി ശ്രമിക്കുന്നു. ഇപ്പോൾ ഉപയോഗിക്കുന്നതോ ഉപയോഗിക്കാൻ ശ്രമിക്കുന്നതോ ആയ സാമഗ്രികൾ, പ്രക്രിയകൾ, സാങ്കേതികവിദ്യ എന്നിവയുടെ പ്രകടനം ഏകീകരിക്കേണ്ടതുണ്ടെങ്കിലും, പ്രതിജ്ഞാബദ്ധമായ രീതിയിൽ പുതിയ കാര്യങ്ങൾ തിരിച്ചറിയുന്നതിനും വികസിപ്പിക്കുന്നതിനുമുള്ള തുടർച്ചയായ ശ്രമങ്ങളും ഇതോടൊപ്പം നടക്കുന്നു.