ചെന്നൈ: ബംഗ്ലാദേശിനെതിരായ ഒന്നാം ക്രിക്കറ്റ് ടെസ്റ്റിൽ ഇന്ത്യയുടെ ഒന്നാം ഇന്നിങ്സ് 376 റൺസിന് അവസാനിച്ചു. 113 റൺസെടുത്ത ആർ. അശ്വിൻ ഇന്ത്യയുടെ ടോപ് സ്കോററായപ്പോൾ, ബംഗ്ലാദേശിനു വേണ്ടി പേസ് ബൗളർ ഹസൻ മെഹ്മൂദ് 83 റൺസ് വഴങ്ങി അഞ്ച് വിക്കറ്റ് സ്വന്തമാക്കി.
339/6 എന്ന നിലയിലാണ് ഇന്ത്യ രണ്ടാം ദിവസം ബാറ്റിങ് പുനരാരംഭിച്ചത്. 86 റൺസെടുത്ത് ക്രീസിലുണ്ടായിരുന്ന രവീന്ദ്ര ജഡേജയ്ക്ക് പിന്നീട് സ്കോർ ചെയ്യാനായില്ല. 102 റൺസിൽ ബാറ്റിങ് പുനരാരംഭിച്ച അശ്വിൻ 11 റൺസ് കൂടി കൂട്ടിച്ചേർത്ത് പുറത്തായി.
പിന്നീട് വന്നവരിൽ 17 റൺസെടുത്ത ആകാശ് ദീപിനു മാത്രമേ കുറച്ചെങ്കിലും ചെറുത്തു നിൽക്കാൻ സാധിച്ചുള്ളൂ. ജസ്പ്രീത് ബുംറ ഏഴു റൺസിനും മുഹമ്മദ് സിറാജ് റൺസൊന്നും എടുക്കാതെയും പുറത്തായി. മെഹ്മൂദിനെ കൂടാതെ മൂന്ന് വിക്കറ്റ് നേടിയ തസ്കിൻ അഹമ്മദും ബംഗ്ലാദേശ് ബൗളിങ് നിരയിൽ തിളങ്ങി.