തിരുവനന്തപുരം: സംസ്ഥാന സർക്കാരിന്‍റെ ഉടമസ്ഥതയിലുള്ള പൊതുമേഖലാ സ്ഥാപനമായ കേരള ഓട്ടൊമൊബൈൽ ലിമിറ്റഡിന്‍റെ (കെഎഎൽ) നേതൃത്വത്തിൽ ആറ് മാസത്തിനകം ഇലക്‌ട്രിക് സ്‌കൂട്ടറുകൾ നിരത്തിലിറക്കുമെന്നു വ്യവസായ മന്ത്രി പി. രാജീവ്. കെഎഎൽ, മുംബൈ ആസ്ഥാനമായി പ്രവർത്തിക്കുന്ന വാഹന നിർമാണക്കമ്പനി ലോഡ്സ് മാർക് ഇൻഡസ്ട്രീസുമായി ചേർന്നു, മട്ടന്നൂർ കിൻഫ്ര പാർക്കിൽ ആരംഭിക്കുന്ന ഇലക്‌ട്രിക് ടൂവീലർ നിർമാണ യൂണിറ്റിന്‍റെ കരാർ ഒപ്പുവയ്ക്കുന്ന ചടങ്ങ് ഉദ്ഘാടനം ചെയ്യുകയായിരുന്നു മന്ത്രി.
കെഎഎല്ലിൽ നിന്നു പുറത്തിറക്കിയ ഇലക്‌ട്രിക് ഓട്ടൊറിക്ഷകൾക്കു മികച്ച പ്രതികരണമാണ് ലഭിച്ചത്. ആദ്യഘട്ടത്തിൽ നിരത്തിലിറങ്ങിയ ഓട്ടൊറിക്ഷകളുമായി ബന്ധപ്പെട്ടുണ്ടായ ചില സാങ്കേതിക പ്രശ്നങ്ങൾക്കു പരിഹാരമായി. ഇലക്‌ട്രിക് ഓട്ടൊറിക്ഷകൾക്കായി വയനാട്ടിലും കണ്ണൂരിലും രണ്ട് സർവീസ് സെന്‍ററുകൾ ആരംഭിക്കും. ഇതിൽ വയനാട്ടിലെ സർവീസ് സെന്‍റർ തുടങ്ങി. ഓട്ടൊറിക്ഷകൾക്കായി നേപ്പാളിൽ നിന്നു വീണ്ടും ഓർഡറുകൾ വരുന്നു. കെഎഎൽ ഓട്ടൊകൾക്കു രാജ്യത്താകെ മികച്ച ഡിമാൻഡ് ഉണ്ടെന്നും മന്ത്രി ചൂണ്ടിക്കാട്ടി.
മട്ടന്നൂർ കിൻഫ്ര പാർക്കിലെ രണ്ട് ഏക്കർ സ്ഥലത്താണ് പുതിയ ടൂവീലർ നിർമാണ പ്ലാന്‍റ് വരുന്നത്. സംയുക്ത സംരംഭത്തിന് 4,64,97,000 രൂപയാണ് അംഗീകൃത മൂലധനം. സംയുക്ത സംരംഭത്തിൽ 26% ഓഹരി കെഎഎല്ലിനും ബാക്കി ലോഡ്സ് മാർക് ഇൻഡസ്ട്രീസിനുമാണ്. സംരംഭം വഴി 200 പേർക്കു നേരിട്ടും നിരവധി പേർക്കു പരോക്ഷമായും തൊഴിൽ ലഭിക്കും. മന്ത്രിയുടെ സാന്നിധ്യത്തിൽ കെഎഎൽ മാനെജിങ് ഡയറക്റ്റർ പി.വി. ശശീന്ദ്രനും ലാൻഡ് മാർക്ക് ഇൻഡസ്ട്രീസ് ഡയറക്റ്റർ സുനിൽ കർഗൂൺകരും പദ്ധതിയുടെ കരാർ പത്രം കൈമാറി.
മാസ്‌കറ്റ് ഹോട്ടലിൽ നടന്ന ചടങ്ങിൽ കെ. ആൻസലൻ എംഎൽഎ, കെഎഎൽ ചെയർമാൻ പുല്ലുവിള സ്റ്റാൻലി, പബ്ലിക് സെക്റ്റർ റീസ്ട്രക്ച്ചറിങ് ആൻഡ് ഇന്‍റേണൽ ഓഡിറ്റ് ബോർഡ് ചെയർമാൻ ഡോ. ആർ. അശോക്, ലോഡ്സ് ഇൻഡസ്ട്രീസ് ഡയറക്റ്റർ വിനോദ് തിവാരി തുടങ്ങിയവർ പങ്കെടുത്തു.
