കൊച്ചി: പ്ലാസ്റ്റിക്കിന്‍റെ ഉപയോഗം കുറയ്ക്കുന്നതിന്‍റെ ഭാഗമായി പുനരുപയോഗിക്കാവുന്ന പേപ്പര്‍ പാക്കെജിങ്ങിനായുള്ള നൂതന സംവിധാനങ്ങള്‍ ഇന്ത്യയിലേക്ക് കൊണ്ടുവരാനൊരുങ്ങുകയാണ് ഇ-കൊമേഴ്സ് കമ്പനിയായ ആമസോണ്.
യുഎസ് ഓഹായോയിലെ കമ്പനിയുടെ കേന്ദ്രത്തില്‍ പ്ലാസ്റ്റിക് പാക്കെജിങ്ങിന് പകരം പുനരുപയോഗിക്കാവുന്ന പേപ്പര്‍ പാക്കെജിങ് സംവിധാനങ്ങള്‍ ഉപയോഗിക്കുന്നുണ്ട്. പ്ലാസ്റ്റിക്കിന് പകരം പേപ്പര്‍ ഉപയോഗിക്കുന്നതിന് നിലവിലുള്ള യന്ത്രങ്ങള്‍ ഉള്‍പ്പെടെ കമ്പനി പുനര്‍നിർമിച്ചു. പുനരുപയോഗിക്കാവുന്ന ഫിറ്റ്-ടു-ഫിറ്റ് പാക്കെജുകള്‍ ഉണ്ടാക്കുന്ന പുതിയ മെഷീനുകള്‍ കമ്പനി വികസിപ്പിച്ചു. ഇത്തരത്തില്‍ യുഎസിലെ ഈ കേന്ദ്രത്തില്‍ നിന്നുള്ള പാക്കെജിങ് പൂര്‍ണമായും പേപ്പര്‍ ഉപയോഗിച്ചുള്ളതായി.
ഇന്ത്യ പോലൊരു വിപണിയുടെ വലുപ്പവും വ്യാപ്തിയും കണക്കിലെടുത്ത് ഇത്തരമൊരു ചുവടുവയ്പ്പ് നടത്തുന്നത് അൽപ്പം പ്രയാസമാണെങ്കിലും പ്രാദേശിക തലത്തില്‍ ഇതുമായി ബന്ധപ്പെട്ട് ചര്‍ച്ചകള്‍ സജീവമായി നടത്തിവരികയാണെന്ന് ആമസോണ് അറിയിച്ചു. വൈകാതെ പുനരുപയോഗിക്കാവുന്ന പേപ്പര്‍ പാക്കെജുകള്‍ ഉണ്ടാക്കുന്ന സംവിധാനം ഇന്ത്യയിലും കൊണ്ടുവരും. ഈ സംവിധാനം വീട്ടില്‍ തന്നെ അവ റീസൈക്കിള്‍ ചെയ്യാന്‍ ഉപയോക്താക്കളെ അനുവദിക്കും.
കമ്പനി ബബിള്‍ റാപ്പുകള്‍ക്ക് പകരമായി പാക്കിങ്
പേപ്പറും പേപ്പര്‍ കുഷ്യനുകളും ഇതിനകം അവതരിപ്പിച്ചിട്ടുണ്ട്. 2022ല്‍ മാത്രം പേപ്പര്‍ അടിസ്ഥാനമാക്കിയുള്ള പാക്കെജിങ് വിപുലീകരിച്ചുകൊണ്ട് ആഗോള തലത്തില്‍ ഒറ്റത്തവണ ഉപയോഗിക്കാവുന്ന പ്ലാസ്റ്റിക് പാക്കെജിങ് ആമസോണ് 11.6% കുറച്ചിരുന്നു.
