ഏലൂർ: ഫാക്ട് 2022 -23 സാമ്പത്തിക വർഷത്തിൽ 612.99 കോടി രൂപയുടെ പ്രവർത്തന ലാഭം നേടി. പലിശയും നികുതികളും ചേർത്ത് ലാഭം 860.32 കോടിയാണ്. ഇത് സർവകാല റിക്കാർഡാണ്. കഴിഞ്ഞ സാമ്പത്തിക വർഷം ലാഭം യഥാക്രമം 353.28 കോടിയും 679.84 കോടിയുമായിരുന്നു. വിറ്റുവരവിലും ചരിത്രനേട്ടം രേഖപ്പെടുത്തി. 6198.15 കോടി രൂപയാണ് വിറ്റുവരവ്. മുൻവർഷം ഇത് 4424.80 കോടി രൂപയായിരുന്നു.
കഴിഞ്ഞ സാമ്പത്തിക വർഷത്തിൽ 9.83 ലക്ഷം ടണ്ണിൽ കവിഞ്ഞ വളം വിൽപ്പനയുണ്ടായി. ഫാക്ടംഫോസ് 7.42 ലക്ഷം ടണ്ണും, അമോണിയം സൾഫേറ്റ് 2.20 ലക്ഷം ടണ്ണും, ജൈവവളം 0.20 ലക്ഷം ടണ്ണും ആയിരുന്നു വിൽപ്പന. ഈ കാലയളവിൽ 43,712 ടൺ കാപ്രോലാക്റ്റം വിൽപ്പനയും നടന്നു.
ഫാക്ടംഫോസിന്റെ ഉൽപ്പാദനം 8.28 ലക്ഷം ടണ്ണായി ഉയർന്നു. ഇത് ഉത്പാദനശേഷിയുടെ 131 ശതമാനമാണ്. അമോണിയം സൾഫേറ്റിന്റെ ഉത്പാദനം ഉത്പാദന ശേഷിയുടെ 109 ശതമാനമായ 2.45 ലക്ഷം ടണ്ണാണ്. കാപ്രോലാക്റ്റം 0.44 ലക്ഷം ടണ്ണും ഉത്പാദിപ്പിച്ചു. ഒരു ഷെയറിന് ഒരു രൂപ വെച്ച് ഡയരക്ടർ ബോർഡ് അന്തിമ ലാഭവിഹിതം ശുപാർശ ചെയ്തിട്ടുണ്ട്.
