ന്യൂഡൽഹി: സൊമാറ്റോ സ്ഥാപകനും സിഇഒയുമായ ദീപിന്ദർ ഗോയൽ വീണ്ടും വിവാഹിതനായതായി റിപ്പോർട്ട്. മെക്സിക്കൻ മോഡലും സംരംഭകയുമായ ഗ്രേസ്യ മുനോസാണ് വധു. ഇരുവരും രണ്ടു മാസങ്ങൾക്കു മുൻപേ വിവാഹിതരായെന്നാണ് റിപ്പോർട്ട്. ഫെബ്രുവരിയിൽ ഹണിമൂണിനു ശേഷം ഇരുവരും ഇന്ത്യയിലേക്ക് തിരിച്ചെത്തിയതായി ഇരുവരുമായും അടുപ്പമുള്ളവർ പറയുന്നു. 2022 ലെ മെട്രൊപൊളിറ്റൻ ഫാഷൻ വീക്കിലെ വിജയിയായിരുന്നു ഗ്രേസ്യ. എന്നാൽ വിവാഹത്തിനു ശേഷം ഗ്രേസ്യ മോഡലിങ്ങിനോട് വിട പറഞ്ഞുവെന്നും അഭ്യൂഹങ്ങളുണ്ട്.
മെക്സിക്കോയിൽ ജനിച്ചു ഇന്ത്യയിൽ ജീവിക്കുന്നു എന്നാണ് ഇൻസ്റ്റയിൽ ഗ്രേസ്യ കുറിച്ചിരിക്കുന്നത്. ഇന്ത്യയിൽ ആഡംഭര ഉത്പന്നങ്ങളുടെ സ്റ്റാർട്ടപ്പ് നടത്തുകയാണ് ഗ്രേസ്യ.
41കാരനായ ഗോയലിന്‍റെ രണ്ടാം വിവാഹമാണിത്. ഐഐടി ഡൽഹിയിൽ ഒരുമിച്ചു പഠിച്ചിരുന്ന കാഞ്ചൻ ജോഷിയാണ് ഗോയലിന്‍റെ ആദ്യഭാര്യ.
