രജനികാന്ത് നായകനായെത്തുന്ന ജയിലർ എന്ന ടൈറ്റിലിന് അവകാശവാദവുമായി സംവിധായകൻ സക്കീര്‍ മഠത്തില്‍. ധ്യാൻ നായകനായി വരാനിരിക്കുന്ന ചിത്രത്തിന് 2021 ഓഗസ്റ്റ് 21ന് കേരള ഫിലിം ചേമ്പറില്‍ ഞങ്ങള്‍ രജിസ്റ്റര്‍ ചെയ്‌തിരുന്നു എന്നാണ് സക്കീര്‍ മഠത്തിൽ അവകാശമുന്നയിക്കുന്നത്.
നെൽസൺ സംവിധാനം ചെയ്യുന്ന രജനികാന്ത് ചിത്രത്തിൻ്റെ ജെയ്‌ലർ എന്ന ടൈറ്റിൽ രജിസ്റ്റര്‍ ചെയ്യുന്നത് 2022ലാണ് എന്നും സക്കീര്‍ മഠത്തില്‍ പറയുന്നു.
'ജയിലര്‍' എന്ന പേര് ആദ്യം രജിസ്റ്റര്‍ ചെയ്തത് ഞങ്ങളാണ്. 2021 ഓഗസ്റ്റ് 21നാണ് കേരള ഫിലിം ചേമ്പറില്‍ ഞങ്ങള്‍ രജിസ്റ്റര്‍ ചെയ്തത്. എന്നാല്‍ രജനികാന്ത് നായകനാകുന്ന 'ജയിലറെ'ന്ന സിനിമ അവര്‍ രജിസ്റ്റര്‍ ചെയ്യുന്നത് 2022ലാണ്. ഒരു ചെറിയ സിനിമയാണ് ഞങ്ങൾ ഒരുക്കുന്നത്. ടൈറ്റിൽ ഇനിയും മാറ്റിയാൽ അത് സിനിമയെ പ്രതികൂലമായി ബാധിക്കും. ഒപ്പം, മലയാള സിനിമയിലെ ഏറ്റവും വലിയ താരങ്ങളിലൊരാളായ മോഹൻലാൽ തമിഴ് ജയിലറില്‍ ഉള്ളതിനാൽ ടൈറ്റിൽ മാറ്റുന്നത് സിനിമയുടെ കളക്ഷനെ ബാധിക്കില്ല, അവർ കൂട്ടിച്ചേർത്തു. എന്നാൽ വലിയ താരങ്ങളെ വെച്ച് നിർമ്മിച്ചിരിക്കുന്നതിനാൽ തലക്കെട്ട് മാറ്റാൻ കഴിയില്ലെന്നാണ് സൺ പിക്‌ചേഴ്‌സ് പുറത്തിറക്കിയ ഔദ്യോഗിക പ്രസ്താവനയിൽ പറയുന്നത്.
അതേസമയം ധ്യാൻ ശ്രീനിവാസൻ നായകനായി എത്തുന്നത് പിരീഡ് ത്രില്ലര്‍ ചിത്രമായിട്ടാണ്. ജയിലറുടെ വേഷത്തിലായിരിക്കും ധ്യാൻ ശ്രീനിവാസനും ചിത്രത്തിലെത്തുന്നത്. മഹാദേവൻ തമ്പിയാണ് ചിത്രത്തിൻ്റെ ഛായാഗ്രാഹണം. ഗോള്‍ഡൻ വില്ലേജിൻ്റെ ബാനറില്‍ ധ്യാൻ ചിത്രം എൻ കെ മുഹമ്മദ് നിര്‍മിക്കുന്നു.
