![ഒരു താരാട്ടുപാട്ട് | കവിത - പ്രഭാവർമ്മ](http://media.assettype.com/metrovaartha%2F2023-11%2F702f6ac9-4201-4867-a81c-0f7ddf48b8d1%2Foru_tharattu_pattu_copy.jpg?w=480&auto=format%2Ccompress&fit=max)
പ്രഭാവര്മ്മ
വാരിളം തിങ്കള്ത്തിടമ്പേ - നിന്നെ
താരാട്ടി ഞാനുറക്കുമ്പോള്...
നീരണിക്കണ്കളിലേതോ നല്ല
നീലക്കിനാവലിയുമ്പോള്...
സ്നിഗ്ദ്ധമാമമ്മിഞ്ഞപ്പാലിന് മണ-
മുള്ളില്പ്പടര്ന്നതിനാലോ...
നല്ക്കിനാവില് ദേവമന്ദസ്മേര
ശുദ്ധി വഴിഞ്ഞതിനാലോ...
നീ മയക്കത്തില് ചിരിപ്പൂ... ഞാനി-
ന്നേതോകിനാവില് ലയിപ്പൂ...
ഏതുമറിയാതെയിന്നെന് മിഴി-
പ്പീലികള് കൂമ്പുന്നതെന്തേ...
ഞാനുമേതോ പാട്ടു നീട്ടും - പട്ടു
തൊട്ടിലിലാടുന്നതെന്തേ...
എള്ളെണ്ണതന് മണം വാര്ന്നെന് - ഉള്ളില്
വന്നു നിറഞ്ഞെന്നപോലേ...
നിന്നെ ഞാന് പാടിയുറക്കുന്നേരം
എന്നമ്മയെന്നെത്തൊടുന്നോ...
എല്ലാം മറന്നു ഞാനിന്നാ മടി-
ത്തൊട്ടിലില് വീണുറങ്ങുന്നോ?