ന്യൂഡൽഹി: ജിമ്മിൽ വ്യായാമം ചെയ്യുന്നതിനിടെ ട്രെഡ്മില്ലിൽ നിന്നു ഷോക്കേറ്റ് യുവാവ് മരിച്ചു. സാക്ഷം പ്രുതി (24) ആണ് മരിച്ചത്. ചൊവ്വാഴ്ച രോഹിണി സെക്ടർ 15 ലെ ജിമ്മിലെത്തിയ യുവാവ് രാവിലെ 7.30 യോടെ ട്രെഡ്മില്ലിൽ വ്യായാമം ചെയ്യുന്നതിനിടെ കുഴഞ്ഞുവീഴുകയായിരുന്നു. അബോധാവസ്ഥയിലായ യുവാവിനെ ഉടനെ സമീപത്തുള്ള ആശുപത്രിയിൽ എത്തിച്ചെങ്കിലും ജീവന് രക്ഷിക്കാനായില്ല.
തുടർന്ന് നടത്തിയ പോസ്റ്റ്മോർട്ടത്തിന്റെ റിപ്പോർട്ടിലാണ് വൈദ്യുതാഘാതമേറ്റതാണ് മരണകാരണമെന്ന് സ്ഥിരീകരിച്ചത്. ഇതെത്തുടർന്ന് ജിം മാനേജർ അനുഭവ് ദുഗ്ഗലിനെ പൊലീസ് അറസ്റ്റ് ചെയ്തു. മനഃപൂർവമല്ലാത്ത നരഹത്യ, യന്ത്രസാമഗ്രികൾ അശ്രദ്ധമായി കൈകാര്യം ചെയ്യൽ എന്നീ കുറ്റങ്ങളാണ് ഇയാൾക്കെതിരേ ചുമത്തിയിരിക്കുന്നതെന്നും പൊലീസ് അറിയിച്ചു. ബിടെക്ക് പൂർത്തിയായ സാക്ഷം ഗുരുഗ്രാമിലെ ഒരു സ്ഥാപനത്തിൽ ജോലി ചെയ്യുകയായിരുന്നു.