കൊച്ചി: പ്രായപൂർത്തിയാകാത്ത പെൺകുട്ടിയെ പ്രലോഭിപ്പിച്ച് കടത്തിക്കൊണ്ടു പോയ കേസിൽ നാലുപേർ പിടിയിൽ. ആലുവ കാഞ്ഞൂർ ഭാഗത്ത് മരോട്ടിക്കുടി വീട്ടിൽ ലിൻ്റോ (26), മലപ്പുറം നിലമ്പൂർ കരിമ്പുഴ ഭാഗത്ത് വിശാലിൽ വീട്ടിൽ മുഹമ്മദ് നിവാസ് (23), മുനമ്പം പള്ളിപ്പുറം ചെറായി ഭാഗത്ത് കല്ലും ത്തറ വീട്ടിൽ വൈശാഖ് (29), നായരമ്പലം നെടുങ്ങാട് ഭാഗത്ത് കൊട്ടാരപ്പറമ്പിൽ വീട്ടിൽ അഭിനവ് (22) എന്നിവരെയാണ് ഞാറക്കൽ പോലീസ് അറസ്റ്റ് ചെയ്തത്. പെൺകുട്ടിയെ ടൂർ പോകാമെന്ന് പറഞ്ഞ് പ്രലോഭിപ്പിച്ച് കടത്തിക്കൊണ്ടുപോകുകയായിരുന്നു.
ചെറായി, ആലങ്ങാട് തുടങ്ങിയ പല പല സ്ഥലങ്ങളിൽ കാറിൽ കറങ്ങിയതായും കണ്ടെത്തി. പ്രതികളിലൊരാളായ അഭിനവാണ് പെൺകുട്ടിയെ വാസസ്ഥലത്തിനടുത്ത് നിന്നും കടത്തിക്കൊണ്ടു പോയത്. ലിന്‍റോ ലോഡ്ജിൽ മുറിയെടുത്ത് ലഹരിവസ്തുക്കൾ കൊടുത്ത് പെൺകുട്ടിയെ ലൈംഗികമായി ചൂഷണം ചെയ്തു. ടാക്സി ഡ്രൈവറായ മുഹമ്മദ് നിവാസ് പെൺകുട്ടിയെ കാറിൽ കയറ്റി ബിയർ നൽകി ലൈംഗികമായി ചൂഷണം ചെയ്തുവെന്നും പൊലീസ് പറയുന്നു.
വൈശാഖ് ഇയാളുടെ കാറിൽ ചെറായിയിലും ആലങ്ങാട് സ്റ്റേഷൻ പരിധിയിലുള്ള മറിയപ്പടി വല്യപ്പൻപടി ഭാഗത്തുള്ള വാടകവീട്ടിലും കൊണ്ടുപോവുകയും വിവിധതരത്തിലുള്ള മാരകമായ ലഹരി വസ്തുക്കൾ പെൺകുട്ടിക്ക് നൽകി മാനസികവിഭ്രാന്തിക്ക് ഇടയാക്കുകയും ചെയ്തു. ഞാറക്കൽ ഇൻസ്പെക്ടർ സുനിൽ തോമസ്, എസ് ഐ മാരായ അഖിൽ വിജയകുമാർ, അനിൽകുമാർ, സി.എ. ഷാഹിർ, എ എസ് ഐ സ്വപ്ന, എസ് സി പി ഓമാരായ റെജി കെ തങ്കപ്പൻ, പ്രിയൻ, രൂപേഷ്, സിപിഒ മാരായ ചിത്ര, ദിവ്യ എന്നിവരാണ് അന്വേഷണസംഘത്തിൽ ഉണ്ടായിരുന്നത്.
