![പ്രതി എസ്.മേനോൻ](http://media.assettype.com/metrovaartha%2F2024-02%2F66335483-a8be-42e7-a774-9065272b7e7d%2Fhjm.jpg?w=480&auto=format%2Ccompress&fit=max)
കോട്ടയം: പൊൻകുന്നത്ത് മധ്യവയസ്കയുടെ സ്വർണമാല കവർച്ച ചെയ്ത കേസിൽ യുവാവിനെ പൊലീസ് അറസ്റ്റ് ചെയ്തു. കങ്ങഴ ഇടയിരിക്കപ്പുഴ കാരമല ഭാഗത്ത് രാജീവ് ഭവനത്തിൽ രാജീവ് എസ്.മേനോനെ(43) യാണ് പൊൻകുന്നം പൊലീസ് അറസ്റ്റ് ചെയ്തത്.
കഴിഞ്ഞ രണ്ടിന് ചിറക്കടവ് ഭാഗത്ത് മുറുക്കാൻകട നടത്തുന്ന മധ്യവയസ്കയുടെ മാലയാണു പൊട്ടിച്ചത്. സാധനം വാങ്ങാനെന്ന വ്യാജേന കടയ്ക്കു മുന്നിൽ സ്കൂട്ടർ നിർത്തിയ ഇയാൾ കടയുടമയായ മധ്യവയസ്ക സാധനങ്ങൾ എടുത്തുകൊണ്ടിരിക്കെ ഒന്നരലക്ഷം രൂപ വില വരുന്ന സ്വർണമാല പൊട്ടിച്ചെടുത്ത്കടന്നുകളയുകയായിരുന്നു. പരാതിയെ തുടർന്ന് പൊൻകുന്നം പൊലീസ് കേസ് രജിസ്റ്റർ ചെയ്യുകയും തുടർന്ന് നടത്തിയ ശാസ്ത്രീയമായ പരിശോധനയിൽ മോഷ്ടാവിനെ തിരിച്ചറിയുകയും തുടർന്ന് ഇയാളെ പിടികൂടുകയുമായിരുന്നു.
പ്രായമായ സ്ത്രീകൾ നടത്തുന്ന മുറുക്കാൻ കടകൾ കേന്ദ്രീകരിച്ച് കവർച്ച നടത്തുന്നതായിരുന്നു ഇയാളുടെ രീതി. എരുമേലി പഴയിടം ഭാഗത്ത് മുറുക്കാൻകട നടത്തിയിരുന്ന സ്ത്രീയുടെ മാലയും ഇയാൾ മോഷ്ടിച്ചതായി കണ്ടെത്തി.