കോഴിക്കോട്: രണ്ടു മാസത്തിനിടെ മൂന്നു കുട്ടികക്ക് സംസ്ഥാനത്ത് അമീബിക് മസ്തിഷ്ക ജ്വരം ബാധിച്ച സാഹചര്യത്തിൽ രോഗത്തെക്കുറിച്ച് പഠിക്കാൻ കേരളത്തിലേക്ക് വിദഗ്ധ സംഘത്തെ അ‍യക്കണമെന്നാവശ്യപ്പെട്ട് കേന്ദ്ര ആരോഗ്യമന്ത്രിക്ക് കത്തയച്ച് എം.കെ. രാഘവൻ എംപി. 2 കുട്ടികൾ മരിച്ചതിനു പുറമേ രോഗം ബാധിച്ച് കോഴിക്കോട് മെഡിക്കൽ കോളെജിൽ പ്രവേശിപ്പിച്ച കുട്ടിയുടെ നില ഗുരുതരമായി തുടരുകയാണ്.
കഴിഞ്ഞ 7 വർഷത്തിനിടെ 6 പേരെ മാത്രം ബാധിച്ചിരുന്ന രോഗം കേരളത്തിൽ അടുത്തടുത്ത ദിവസങ്ങളിൽ കൂടുതൽ പേരിലേക്ക് വ്യാപിക്കുന്നത് ആശങ്ക സൃഷ്ടിക്കുന്നു. ഈ സാഹചര്യത്തിൽ കൃത്യമായ പഠനം ആവശ്യമാണെന്ന് കാട്ടിയാണ് എംപി കത്തയച്ചത്.
