കോട്ടയം: മുതിർന്ന മാധ്യമ പ്രവർത്തകനും മെട്രൊ വാർത്ത ചീഫ് എഡിറ്ററുമായിരുന്ന ആർ. ഗോപീകൃഷ്ണന്‍റെ സ്മരണാർഥം കോട്ടയം പ്രസ് ക്ലബ് ഏർപ്പെടുത്തിയ മാധ്യമ പുരസ്കാരത്തിന് മാതൃഭൂമി കോഴിക്കോട് യൂണിറ്റിലെ സബ് എഡിറ്റർ അഞ്ജന ഉണ്ണികൃഷ്ണൻ അർഹയായി. 25,000 രൂപയും ശിൽപവും പ്രശസ്തിപത്രവും അടങ്ങുന്നതാണ് പുരസ്കാരം.
മുതിർന്ന മാധ്യമ പ്രവർത്തകരായ ടി.കെ. രാജഗോപാൽ, ഇ.പി. ഷാജുദ്ദീൻ, ജിമ്മി ഫിലിപ്പ് എന്നിവരടങ്ങിയ ജൂറിയാണ് പുരസ്കാര ജേതാവിനെ കണ്ടെത്തിയത്. വർധിച്ചു വരുന്ന പുരുഷ ആത്മഹത്യകളുടെ കണക്കുകളും കാരണങ്ങളും ഉൾപ്പെടുത്തി തയാറാക്കിയ "പാതിവഴിയിൽ പൊലിയുന്ന അവൻ' എന്ന പരമ്പരയാണ് അഞ്ജനയ്ക്കു പുരസ്കാരം നേടിക്കൊടുത്തത്.
സമൂഹത്തിൽ ആത്മഹത്യകളുടെ എണ്ണം കൂടുന്നത് ചർച്ചയാകുന്നുണ്ടെങ്കിലും പുരുഷ ആത്മഹത്യകളുടെ ഗണ്യമായ വർധനയെക്കുറിച്ച് ചർച്ചകളുണ്ടാകുന്നില്ല. പുരുഷ ആത്മഹത്യകളിലെ വർധിച്ച കണക്കുകളും ഇതിന്‍റെ കാരണങ്ങളും നിരത്തിയുള്ള സമഗ്രമായ റിപ്പോർട്ടാണ് അഞ്ജനയെ അവാർഡിന് അർഹയാക്കിയത്.
