![Flights cancelled from Karipur due to bad weather](http://media.assettype.com/metrovaartha%2F2023-07%2Fc6c1476f-58f4-41e5-b0f8-cb69fe82ec76%2Fair_indiaa.jpg?w=480&auto=format%2Ccompress&fit=max)
കോഴിക്കോട്: പ്രതികൂല കാലാവസ്ഥയെ തുടർന്ന് കരിപ്പൂരിൽ 3 വിമാനങ്ങൾ റദ്ദാക്കി. കരിപ്പൂരില് നിന്നുള്ള എയർ ഇന്ത്യ എക്സ്പ്രസിന്റെ റിയാദ്, അബുദാബി, മസ്ക്കറ്റ് എന്നിവിടങ്ങളിലേക്കുള്ള വിമാന സർവീസുകളാണ് റദ്ദാക്കിയത്.
ഇന്നലെ രാത്രി 11.10ന് പുറപ്പെടേണ്ടിയിരുന്നതായിരുന്നു മസ്കറ്റിലേക്കുള്ള എയര് ഇന്ത്യാ എക്സ്പ്രസ് വിമാനം. വിമാനം 4 മണിക്കൂര് വൈകുമെന്നായിരുന്നു ആദ്യം അറിയിച്ചിരുന്നതെന്നും പിന്നീട് അത് നീണ്ടുപോവുകയായിരുന്നുവെന്നും യാത്രക്കാര് പറയുന്നു. ഭക്ഷണവും വെള്ളവും താമസസൗകര്യവും ഒരുക്കിയിട്ടില്ലായെന്നാണ് യാത്രക്കാര് പറയുന്നത്. നൂറിലധികം യാത്രക്കാരായിരുന്നു പ്രതിഷേധിച്ചിരുന്നത്. എന്നാൽ മോശം കാലാവസ്ഥയെ തുടർന്നതോടെ വിമാനങ്ങൾ റദ്ദാക്കുകയായിരുന്നു.
അതേസമയം മുന്നറിയിപ്പില്ലാതെ മംഗളൂരുവില് ലാന്ഡ് ചെയ്ത ദോഹ – കോഴിക്കോട് വിമാനം കോഴിക്കോട്ടേക്ക് പുറപ്പെട്ടു. കാലാവസ്ഥ മോശമായതിനാല് കോഴിക്കോടും കണ്ണൂരിലും വിമാനം ഇറക്കാന് കഴിഞ്ഞില്ല. ഇതേത്തുടർന്ന് രാത്രി മുതല് യാത്രക്കാര് വിമാനത്തില് തുടരുകയായിരുന്നു.