തിരുവനന്തപുരം: സർക്കാരിനോട് ഹേമ കമ്മിറ്റി റിപ്പോർട്ടിന്‍റെ പൂർണ്ണരൂപം ഹാജരാക്കാൻ ആവ‍ശ‍്യപെട്ട് ദേശീയ വനിതാ കമ്മീഷൻ. ചീഫ് സെക്രട്ടറിക്ക് അയച്ച കത്തിലാണ് ഒരാഴ്ച്ചയ്ക്കുള്ളിൽ റിപ്പോർട്ട് ഹാജരാക്കണം എന്ന് ആവശ‍്യപെട്ടത്. ബിജെപി നേതാക്കളായ സന്ദീപ് വചസ്പതി,ശിവശങ്കർ എന്നിവർ ദേശീയ വനിതാ കമ്മീഷന് നൽകിയ പരാതിയുടെ അടിസ്ഥാനത്തിലാണ് കമ്മിഷന്‍റെ ഇടപെടൽ.
ഹേമ കമ്മിറ്റി റിപ്പോർട്ടിൽ ആരോപണ വിധേയരായവർക്കെതിരെ നിയമ നടപടി സ്വീകരിച്ചില്ലെന്ന് ആരോപിച്ചാണ് നേതാക്കൾ കമ്മിഷന് പരാതി നൽകിയത്. റിപ്പോർട്ടിൽ ആരോപിതരായവർക്കെതിരെ സർക്കാർ വിലപേശുന്നുണ്ടോ എന്ന് സംശയം ഉണ്ടെന്നും ആരോപണവിധേയരുടെ പേരുകൾ ഒളിച്ചു വയ്ക്കേണ്ടതില്ലെന്നും നേതാക്കൾ പറഞ്ഞു. റിപ്പോർട്ടിൽ പേരുള്ള ആരോപണവിധേയർക്കെതിരെയല്ല സർക്കാർ ഇപ്പോൾ കേസ് എടുത്തിരിക്കുന്നതെന്നും നേതാക്കൾ കമ്മിഷനെ അറിയിച്ചു.
