ബംഗളൂരു: ഷിരൂരിൽ ദേശീയ പാതയിൽ മണ്ണിടിച്ചിലിനെ തുടർന്ന് കാണാതായ കോഴിക്കോട് സ്വദേശി അർജുനു വേണ്ടിയുള്ള തെരച്ചിൽ താത്കാലികമായി നിർത്തി. കനത്ത മഴയും മണ്ണിടിച്ചിലും, ഇരുട്ടും രക്ഷാപ്രവർത്തനത്തിന് വെല്ലുവിളിയായ സാഹചര്യത്തിലാണ് ദൗത്യം താത്കാലിമായി നിർത്തിയതെന്ന് ജില്ലാ പൊലീസ് മേധാവി എം. നാരായണ പറഞ്ഞു. ശനിയാഴ്ച ദൗത്യം തുടരും. അപകടമുണ്ടായി നാലു ദിവസങ്ങൾക്കു ശേഷമാണ് തെരച്ചിൽ ഊർജിതമാക്കിയത്. പ്രദേശത്ത് ഇപ്പോഴും മണ്ണിടിച്ചിൽ സാധ്യതയുണ്ട്.
അർജുന്റെ ലോറി നദിയിൽ ഇല്ലെന്ന് അധികൃതർ സ്ഥിരീകരിച്ചിട്ടുണ്ട്. നേവി ഡൈവർമാർക്കു പുറമേ 100 എൻഡിആർഎഫ് സംഘവും രക്ഷാ പ്രവർത്തനത്തിൽ പങ്കാളികളാണ്.
ജൂലൈ 8നാണ് മരം കൊണ്ടു വരുന്നതിനായി അർജുൻ കർണാടകയിലേക്ക് പോയത്.
