തിരുവനന്തപുരം: സോളാർ പീഡനക്കേസിൽ എംപി ഹൈബി ഈഡനെ കുറ്റവിമുക്തനായി. ആരോപണത്തിൽ ഹൈബിക്കെതിരേ തെളിവില്ലെന്ന സിബിഐ റിപ്പോർട്ട് അംഗീകരിച്ചു കൊണ്ടാണ് തിരുവനന്തപുരം സിജെഎം കോടതി ഹൈബിയെ കുറ്റവിമുക്തനാക്കിയത്.
സിബിഐ റിപ്പോർട്ട് അംഗീകരിക്കരുതെന്ന പരാതിക്കാരിയുടെ ഹർജി തള്ളിക്കൊണ്ടാണ് കോടതി വിധി പ്രസ്താവിച്ചത്.എംഎൽഎ ഹോസ്റ്റലിൽ വിളിച്ചു വരുത്തി ഹൈബി ഈഡൻ പീഡിപ്പിച്ചുവെന്നായിരുന്നു പരാതി.
കേസിൽ കൂടുതൽ അന്വേഷണം വേണമെന്നും പരാതിക്കാരി ആവശ്യപ്പെട്ടിരുന്നു. എന്നാൽ പരാതിക്കാരി തെളിവുകളൊന്നും ഹാജരാക്കിയിട്ടില്ലെന്നും ശാസ്ത്രീയമായ തെളിവുകൾ കണ്ടെത്താൻ സാധിച്ചിട്ടില്ലെന്നും സിബിഐ റിപ്പോർട്ട് നൽകി. പീഡന പരാതിയിൽ ആറു കേസുകളിലാണ് സിബിഐ അന്വേഷണം പ്രഖ്യാപിച്ചിരുന്നത്.
