കൊച്ചി: ശബരിമല സന്നിധാനത്തിന്‍റെ പതിനെട്ടാം പടിയിൽ ശ്രീകോവിലിനു തിരിഞ്ഞു നിന്ന് പൊലീസ് ഉദ്യോഗസ്ഥർ ഫോട്ടോയെടുത്ത സംഭവത്തിൽ വിമര്‍ശനവുമായി ഹൈക്കോടതി. സന്നിധാനത്തെ പൊലീസ് പ്രവർത്തനം പ്രശംസനീയമാണ്. എന്നാൽ, ഇത്തരം നടപടികൾ അനുവദനീയമല്ല. തിരുമുറ്റത്തും സോപാനത്തിലും മൊബൈൽ ഫോൺ ഉപയോഗിച്ചുള്ള വീഡിയോ ചിത്രീകരണം സംബന്ധിച്ച് എക്സിക്യൂട്ടീവ് ഓഫിസർ റിപ്പോർട്ട് നൽകണമെന്നും ദേവസ്വം ബെഞ്ച് നിർദേശിച്ചു.
ശബരിമലയിൽ ഭക്തരിൽ നിന്ന് അമിതമായി അനധികൃതമായി വില ഈടാക്കുന്ന കടകള്‍ക്കെതിരേ കര്‍ശന നടപടിയെടുക്കണമെന്ന് നിലയ്ക്കൽ, പമ്പ, സന്നിധാനം എന്നിവിടങ്ങളിലെ ഡ്യൂട്ടി മജിസ്ട്രേറ്റുമാർക്കു നിര്‍ദേശം നൽകി. തീർഥാടനത്തിലെ ക്രമീകരണങ്ങളുമായി ബന്ധപ്പെട്ട ഹര്‍ജികള്‍ പരിഗണിക്കുകയായിരുന്നു ബെഞ്ച്.
ഹോട്ടലുകൾ കേന്ദ്രീകരിച്ച് ചില പ്രശ്നങ്ങൾ സ്പെഷ്യൽ കമ്മിഷണർ സൂചിപ്പിച്ചതായും ഹൈക്കോടതി വ്യക്തമാക്കി. ഇതു സംബന്ധിച്ച് ദേവസ്വം ബോർഡിനോട് വിവരങ്ങൾ ആരാഞ്ഞ ശേഷമാണ് പരിശോധന സംബന്ധിച്ച നിര്‍ദേശം ഹൈക്കോടതി നൽകിയത്.
അതേസമയം, ഫോട്ടോ ഷൂട്ട് വിവാദമായതിനു പിന്നാലെ റിപ്പോർട്ട് തേടി എഡിജിപി എസ്. ശ്രീജിത്ത് രംഗത്തെത്തി. ഡ്യൂട്ടി പൂർത്തിയാക്കി മടങ്ങും മുമ്പ് പതിനെട്ടാം പടിയില്‍ തിരിഞ്ഞുനിന്ന് പൊലീസുകാര് ചിത്രമെടുത്തതു വിവാദമായതിനാലാണ് സന്നിധാനം സ്‌പെഷല്‍ ഓഫിസര്‍ കെ.ഇ. ബൈജുവിനോട് എഡിജിപി റിപ്പോര്‍ട്ട് തേടിയത്.
ഡ്യൂട്ടിക്കു ശേഷം തിങ്കളാഴ്ച മടങ്ങിയ ആദ്യ ബാച്ചിലെ പൊലീസുകാർ ശനിയാഴ്ച ഉച്ചയ്ക്ക് ഒരു മണിക്ക് നടയടച്ച ശേഷം പടിയുടെ താഴെ മുതൽ വരി വരിയായി നിന്ന് ഫോട്ടോ എടുക്കുകയായിരുന്നു. ഈ ചിത്രങ്ങള്‍ സമൂഹമാധ്യമങ്ങളിൽ പ്രചരിച്ചതോടെ വിവാദമായി. വിശ്വഹിന്ദു പരിഷത്തും കേരള ക്ഷേത്ര സംരക്ഷണ സമിതിയും രംഗത്തെത്തി. തന്ത്രിയും മേൽശാന്തിയും അടക്കമുള്ള ആചാര്യന്മാർ പോലും നടയടച്ച് ഇറങ്ങുമ്പോൾ മുന്നോട്ടു നോക്കിയാണ് പടിയിറങ്ങുന്നത്.
ആചാര ലംഘനം നടത്തിയ ഉദ്യോഗസ്ഥന്മാർക്കെതിരേ കർശന നടപടികൾ സ്വീകരിക്കണമെന്നും അയ്യപ്പ വിശ്വാസികളായ ഉദ്യോഗസ്ഥരെ ഡ്യൂട്ടിക്ക് നിയോഗിക്കണമെന്നും ക്ഷേത്ര സംരക്ഷണ സമിതി സംസ്ഥാന സെക്രട്ടറി വി.കെ. ചന്ദ്രൻ ആവശ്യപ്പെട്ടു.
