![75 ലക്ഷം രൂപ ഒന്നാം സമ്മാനം അടിച്ചു; ഞെട്ടലിൽ അന്യസംസ്ഥാന തൊഴിലാളി ഓടിയെത്തിയത് പൊലീസ് സ്റ്റേഷനിൽ](http://media.assettype.com/metrovaartha%2F2023-03%2Ff5e6b442-1155-4db9-8688-048f0ee55139%2Fkerala_lottery_result_today.jpg?w=480&auto=format%2Ccompress&fit=max)
കൊച്ചി: ലോട്ടറി അടിച്ച ഞെട്ടലിൽ അന്യസംസ്ഥാന തൊഴിലാളി ഓടിയെത്തിയത് പൊലീസ് സ്റ്റേഷനിലേക്ക്. കൊൽക്കത്ത സ്വദേശിയായ എസ്.കെ.ബദേസിനാണ് സ്ത്രീശക്തി ലോട്ടറിയുടെ 75 ലക്ഷം രൂപ ഒന്നാം സമ്മാനം അടിച്ചത്.
ഒന്നാം സമ്മാനം അടിച്ച കാര്യം അറിഞ്ഞപ്പോൾ എന്തുചെയ്യണമെന്നറിയാതെ പകച്ചുപോയ ബദേസ് ഉടനെ ഓടിയെത്തിയത് മൂവാറ്റുപുഴ പൊലീസ് സ്റ്റേഷനിലേക്ക്. അവിടെ എത്തിയതും തനിക്ക് ലോട്ടറി അടിച്ച വിവരം പൊലീസുദ്യോഗസ്ഥരോട് അറിയിച്ചു. ആരെങ്കിലും തൻ്റെ കയ്യിൽ നിന്നും ലോട്ടറി തട്ടിയെടുക്കുമോ എന്ന ആശങ്കയുള്ളതിനാലാണ് ബദേസ് പൊലീസ് സ്റ്റേഷനിൽ സഹായത്തിനായി എത്തിയത്.
സ്റ്റേഷനിൽ എത്തിയ ബദേസിന് പൊലീസ് വേണ്ട സഹായം നൽകി. ഈ വിവരം കേരളാ പൊലീസ് തന്നെയാണ് സോഷ്യൽ മീഡിയയിലൂടെ അറിയിച്ചത്. ബദേസിനെ പൊലീസ് ഉദ്യോഗസ്ഥർ ആശ്വസിപ്പിക്കുകയും കൃത്യമായ മാർഗ്ഗ നിർദ്ദേശങ്ങളും ഉപദേശങ്ങളും നൽകുകയും ചെയ്തു.
റോഡ് ടാറിങ് ജോലിക്കായി ചോറ്റാനിക്കരയിലെത്തിയപ്പോഴാണ് ഇയാൾ ലോട്ടറി എടുത്തത്. ഭാഗ്യമായി ലഭിച്ച പണവുമായി കൊൽക്കത്തയിലേക്ക് മടങ്ങാനായി കാത്തിരിക്കുകയാണ് ബദേസ്.