തൃശൂർ: നീലിപ്പാറയിൽ കാറിൽ മറ്റൊരു വാഹനം ഇടിപ്പിച്ചു നിർത്തിച്ച ശേഷം യുവാവിനെ തട്ടിക്കൊണ്ടുപോയതായി പരാതി. കുഴൽപണ സംഘങ്ങളാണ് സംഭവത്തിന് പിന്നിലെന്നാണ് സൂചന. ആരെയാണ് തട്ടിക്കൊണ്ടുപോയതെന്ന് വ്യക്തമായിട്ടില്ല. നാട്ടുകാർ വിവരം അറിയിച്ചതിന്‍റെ അടിസ്ഥാനത്തിൽ പോലീസ് അന്വേഷണം ആരംഭിച്ചു.
പാലക്കാട് - തൃശൂർ ദേശീയപാതയിൽ വ്യാഴാഴ്ച ഉച്ചയക്ക് 2 മണിയോടെയാണ് സംഭവം. തൃശ്ശൂർ ഭാഗത്തേക്ക് പോവുകയായിരുന്ന ചുവന്ന കാറിനു മുന്നിലും പിന്നിലുമായി മൂന്നു കാറുകൾ വരികയും കാർ തടയുകയും ചെയ്തു. തുടർന്ന് പിന്നിൽ വന്ന കാറിൽ നിന്നിറങ്ങിയവർ ചുവന്ന കാറിൽ നിന്നും ഒരാളെ ബലമായി പിടിച്ചിറക്കി പിന്നിലെ കാറിൽ കയറ്റുകയും ചെയ്ത ശേഷം കാറും തട്ടിയെടുത്ത് പോവുകയായിരുന്നു.
തുടരന്വേഷണത്തിനിടെ തട്ടിയെടുത്ത കാർ കൊന്നഞ്ചേരിക്കു സമീപം റോഡിനരികിൽ ഉപേക്ഷിച്ച നിലയിൽ പോലീസ് കണ്ടെത്തി. നാട്ടുകാരിലൊരാൾ പകർത്തിയ സംഭവത്തിൻ്റെ ദൃശ്യം പൊലീസിന് കൈമാറി.
