കൊച്ചി: ഇസ്രായേലിൽ നിന്നെത്തിയ ആദ്യ സംഘത്തിലെ മലയാളികൾ കൊച്ചി വിമാനത്താവളത്തിലെത്തി.
ഡൽഹിയിലെത്തിയ ആദ്യസംഘത്തിൽ 7 മലയാളികളാണ് ഉള്ളത്. 5 പേര്‍ നോര്‍ക്ക വഴിയും 2 പേര്‍ സ്വന്തം നിലയിലുമാണ് എത്തിയത്. ഇസ്രയേലില്‍ സമാധാനം പുന:സ്ഥാപിച്ചാല്‍ തിരികെ പോകാനാകുമെന്നും തിരിച്ചെത്തിയ വിദ്യാര്‍ത്ഥികള്‍ പ്രതികരിച്ചു.
'ഓപ്പറേഷന്‍ അജയ്’യുടെ ഭാഗമായാണ് മലയാളികളെ അടക്കം തിരികെയെത്തിക്കുന്നത്. ഇന്ത്യക്കാരുമായുള്ള ആദ്യ വിമാനം ഇന്ന് രാവിലെ 6 മണിയോടെയാണ് ഡൽഹിയിലെത്തിയത്. കേരളത്തിൽ നിന്നുള്ള 7 വിദ്യാർഥികളടക്കം 212 പേരാണ് ആദ്യ വിമാനത്തിൽ ഉണ്ടായരുന്നത്. കേന്ദ്രമന്ത്രി രാജീവ് ചന്ദ്രശേഖര്‍ വിമാനത്താവളത്തില്‍ നേരിട്ടെത്തി യുദ്ധമുഭൂമിയിൽ നിന്നും മടങ്ങിയെത്തിയവരെ സ്വീകരിച്ചു.
അടുത്ത 5 ദിവസങ്ങളില്‍, ഓരോ വിമാനം വീതം ഓപ്പറേഷന്‍ അജയുടെ ഭാഗമായി ക്രമീകരിച്ചിട്ടുണ്ട്. ഇസ്രയേലില്‍ കുടുങ്ങിയ എല്ലാ ഇന്ത്യക്കാരെയും സുരക്ഷിതമായി നാട്ടില്‍ എത്തിക്കുമെന്നും അദ്ദേഹം പറഞ്ഞു. കേരള ഹൗസ് അധികൃതരും വിമാനത്താവളത്തില്‍ എത്തിയിരുന്നു. തുടര്‍പ്രവര്‍ത്തനങ്ങളുടെ ഏകോപനത്തിനായി ഡല്‍ഹി കേരള ഹൗസില്‍ കണ്‍ട്രോള്‍ റൂം തുറന്നിട്ടുണ്ട്.
