![pantheerankavu domestic violence case updation](http://media.assettype.com/metrovaartha%2F2024-05%2F54d0dfdf-c551-4d40-bb74-a1ffb3586c83%2F1.jpg?w=480&auto=format%2Ccompress&fit=max)
കോഴിക്കോട്: പന്തീരങ്കാവ് ഗാർഹിക പീഡന കേസിൽ യുവതിയുടെ മൊഴിമാറ്റം കേസിനെ ബാധിക്കില്ലെന്ന് അന്വേഷണ സംഘം. ഭീഷണിപ്പെടുത്തി യുവതിയെ കൊണ്ട് മൊഴിമാറ്റിച്ചതാകാമെന്നാണ് പൊലീസിന്റെ പ്രാഥമിക നിഗമനം. പ്രതി രാഹുലിനെതിരെ യുവതി കോടതിയില് നല്കിയ രഹസ്യമൊഴി കണക്കിലെടുത്ത് മുന്നോട്ടുപോകാനാണ് അന്വേഷണ സംഘത്തിന്റെ തീരുമാനം.
അതിനിടെ ഒന്നാം പ്രതിയെ കണ്ടെത്താൻ കഴിഞ്ഞില്ലെന്ന് കാട്ടി അഞ്ചു ദിവസത്തിനകം അന്വേഷണ സംഘം കുറ്റപത്രം സമർപ്പിക്കും. പ്രതി രാഹുൽ അന്വേഷണത്തിനിടെ ജർമ്മനിയിലേക്ക് കടക്കുകയായിരുന്നു. പ്രതികളെ സഹായിച്ച സീനിയര് സിവില് പൊലീസ് ഓഫീസറെ പൊലീസ് ഇന്ന് ചോദ്യം ചെയ്യും.പരാതിക്കാരിയുടെ മൊഴിമാറ്റം പ്രതികള്ക്ക് കോടതിയുടെ ശ്രദ്ധയില്പ്പെടുത്താമെന്നും പൊലീസ് അറിയിച്ചു.
അതിനിടെ, യുവതിയെ ഭീഷണിപ്പെടുത്തുകയോ വാഗ്ദാനം നൽകുകയോ ചെയ്തിട്ടില്ലെന്ന് പ്രതിഭാഗം അഭിഭാഷകൻ മാധ്യമങ്ങളോട് പറഞ്ഞു. കേസ് റദ്ദാക്കാനുള്ള സത്യവാങ്മൂലം പരാതിക്കാരി ഒപ്പിട്ട് നല്കിയിട്ടുണ്ട്. യുവതി പൂര്ണ സമ്മതത്തോടെയാണ് ഒപ്പിട്ട് നല്കിയത്. തുടര്നടപടിക്കായി പ്രതിഭാഗം ഹൈക്കോടതിയെ സമീപിച്ചതായും അഭിഭാഷകന് പറഞ്ഞു.