സന്നിധാനം: ശബരിമല സന്നിധാനത്ത് പതിനെട്ടാം പടിക്ക് സമീപത്തു നിന്നും പാമ്പിനെ പിടികൂടി വനം വകുപ്പ് ഉദ്യോഗസ്ഥർ. പതിനെട്ടാം പടിക്ക് താഴെ മഹാ കണിയ്ക്ക ഭാഗത്തു നിന്നും അപ്പം അരവണ കൗണ്ടറിലേക്ക് പോവുന്നതിനുള്ള അടിപ്പാതയുടെ പടിക്കെട്ടിനു സമീപത്തെ കൈവരിയിലാണ് പാമ്പിനെ കണ്ടെത്തിയത്. ഭക്തരടക്കം പരിഭ്രാന്തരായി. ഇന്ന് രാവിലെ ഒൻപതോടെയാണ് സംഭവം.
സന്നിധാനത്തിന്‍റെ പല ഭാഗങ്ങളിൽനിന്നും വിഷപ്പാമ്പുകളെ പിടികൂടാറുണ്ടെങ്കിലും പതിനെട്ടാം പടിക്ക് സമീപത്തു നിന്നും പാമ്പിനെ പിടികൂടുന്നത് ഇതാദ്യമാണ്. സംഭവം അറിഞ്ഞ് ഉടൻ എത്തിയ വനം വകുപ്പ് ഉദ്യോഗസ്ഥർ ചേർന്ന് പിടികൂടാൻ ഉള്ള ശ്രമത്തിനിടെ പാമ്പ് കൈവരിയിൽ നിന്നും പടിക്കട്ടിലേക്ക് ചാടുകയായിരുന്നു. തുടർന്ന് ഇവിടെ നിന്നും പാമ്പിനെ പിടികൂടി.
