താനെ: തിങ്കളാഴ്ച രാത്രി മുംബൈ എക്സ്പ്രസ് ഹൈവേയ്ക്ക് സമീപം ബസും ട്രാക്റ്ററും കൂട്ടിയിടിച്ച് അപകടം. 5 പേർ മരിച്ചു. നിരവധി പേർക്ക് ഗുരുതരമായി പരുക്കേറ്റു. അപകടത്തെ തുടർന്ന് ബസ് ഒരു കുഴിയിലേക്ക് മറിയുകയായിരുന്നു.
പരുക്കേറ്റ എല്ലാവരെയും അടുത്തുള്ള ആശുപത്രിയിൽ പ്രവേശിപ്പിച്ചതായി അധികൃതർ അറിയിച്ചു. പരുക്കേറ്റ 42 പേരെ എംജിഎം ആശുപത്രിയിലേക്കും 3 പേരെ സർക്കാർ ആശുപത്രിയിലേക്കും മാറ്റി. 5 പേരുടെ ജീവൻ നഷ്ടപ്പെട്ടതായി ഡോക്ടർമാർ സ്ഥിരീകരിച്ചു.
ഡോംബിവ്‌ലിയിലെ കേസർ ഗ്രാമത്തിൽ നിന്ന് മഹാരാഷ്ട്രയിലെ പന്ധർപൂരിലേക്ക് തീർത്ഥയാത്ര പോവുകയായിരുന്ന ബസാണ് അപകടത്തിൽപ്പെട്ടതെന്ന് അധികൃതർ അറിയിച്ചു.അപകടത്തെത്തുടർന്ന് മുംബൈ എക്സ്പ്രസ് ഹൈവേയിലെ മുംബൈ-ലോണാവാല പാതയിൽ വാഹനഗതാഗതം പൂർണമായും രാത്രിയിൽ സ്തംഭിച്ചു.എന്നാൽ അധികം താമസിയാതെ ക്രെയിനിന്‍റെ സഹായത്തോടെ ബസ് വീണ്ടെടുക്കാൻ അധികൃതർക്ക് കഴിഞ്ഞു, മൂന്ന് മണിക്കൂർ ഗതാഗതം തടസപ്പെടുത്തിയതിന് ശേഷം പാതയിലെ സാധാരണ ഗതാഗതം പുനരാരംഭിക്കുകയായിരുന്നു.
