നവിമുംബൈ: ഉൾവേയിലെ സെക്ടർ ഒൻപതിലുള്ള റോക്ക് ഗാർഡനിൽ ചിൽഡ്രൻസ് ക്ലബ്ബിന്‍റെ നേതൃത്വത്തിൽ കുട്ടികളും മുതിർന്നവരും ചേർന്ന് വൃക്ഷത്തൈകൾ നട്ടു. ഭാവി തലമുറയ്ക്ക് ഉപകാരപ്പെടുന്ന തൈകളാണ് നട്ടിരിക്കുന്നത്. മഴക്കാലത്തിന് ശേഷവും കുട്ടികൾക്ക് ഈ തൈകൾ സംരക്ഷിക്കാനായുള്ള നിർദ്ദേശങ്ങളും പ്രോത്സാഹനവും നൽകാനാണ് ചിൽഡ്രൻസ് ക്ലബ് ഭാരവാഹികളുടെ തീരുമാനം.
വൃക്ഷങ്ങൾ പടർന്നു പന്തലിക്കും പോലെ കുട്ടികൾക്കിടയിലെ സൗഹൃദങ്ങളും സമൂഹത്തോടുള്ള ഉത്തരവാദിത്തങ്ങളും വളർത്തിയെടുക്കുക എന്നതാണ് ചിൽഡ്രൻസ് ക്ലബ്ബിന്‍റെ ലക്ഷ്യമെന്ന്‌ ഭാരവാഹികൾ അറിയിച്ചു.
"ഒരു തൈ നടാം നമുക്കും!! ആ ചില്ലയിലൊരുപാട് കിളികൾ കൂടുകൂട്ടുമായിരിക്കും, ആ ചില്ലയിൽ വിരിയുന്ന പൂക്കളിൽ
നിന്നൊരുപാട് കുരുവികൾ തേൻ കുടിക്കുമായിരിക്കും, ആ മരത്തിലെ കനികൾ തിന്ന് ഒരുപാട് ജീവജാലങ്ങൾ
വിശപ്പടക്കുമായിരിക്കും" ഇങ്ങനൊരു സന്ദേശം കുട്ടികൾക്ക് നൽകികൊണ്ടാണ് കുട്ടികളെ ഇങ്ങനൊരു സൽകർമ്മത്തിന് സന്നദ്ധരാക്കിയതെന്ന് ചിൽഡ്രൻസ് ക്ലബ് വ്യക്തമാക്കി.
