ന്യൂഡൽഹി: അയോധ്യയിലെ രാമക്ഷേത്രത്തിൽ അടുത്തമാസം നടക്കുന്ന പ്രതിഷ്ഠാച്ചടങ്ങുകളിലേക്ക് മുതിർന്ന ബിജെപി നേതാക്കളായ എൽ.കെ. അഡ്വാനിക്കും മുരളി മനോഹർ ജോഷിക്കും ക്ഷണം. വിഎച്ച്പി എക്സിക്യൂട്ടിവ് പ്രസിഡന്‍റ് ആലോക് കുമാറിന്‍റെ നേതൃത്വത്തിലുള്ള സംഘമാണ് ഇരുവരെയും സന്ദർശിച്ച് ക്ഷണപത്രം കൈമാറിയത്.
പ്രായവും ആരോഗ്യാവസ്ഥകളും പരിഗണിച്ച് അഡ്വാനിയും (96) ജോഷിയും (89) പങ്കെടുക്കില്ലെന്നായിരുന്നു നേരത്തേയുള്ള സൂചന. പ്രതീക്ഷിക്കാനാവാത്ത തിരക്കുള്ള ചടങ്ങിൽ പങ്കെടുക്കുന്നത് ഒഴിവാക്കണമെന്ന് ഇരുവരോടും അഭ്യർഥിച്ചെന്നും നേതാക്കൾ ഇതു സ്വീകരിച്ചെന്നും ശ്രീരാമജന്മഭൂമി തീർഥക്ഷേത്ര ട്രസ്റ്റ് സെക്രട്ടറി ചമ്പത് റായി അറിയിച്ചിരുന്നു. ഇതിനുപിന്നാലെയാണ് ക്ഷണം.
പങ്കെടുക്കാൻ ആഗ്രഹമുണ്ടെന്നും പരമാവധി ശ്രമിക്കുമെന്നും അഡ്വാനിയും ജോഷിയും അറിയിച്ചതായി ആലോക് കുമാർ പറഞ്ഞു. ജനുവരി 16 മുതൽ 22വരെയാണ് പ്രതിഷ്ഠാ ചടങ്ങുകൾ.
