ഡൽഹി: കേരളത്തിലും ബിജെപി സർക്കാരുണ്ടാക്കുമെന്നു പ്രധാനമന്ത്രി നരേന്ദ്ര മോദി. ബിജെപി ഡൽഹി ആസ്ഥാനത്തെ വിജയാഘോഷത്തിൽ പ്രസംഗിക്കുമ്പോഴായിരുന്നു ഈ പരാമർശം. കേരളത്തിലും ബിജെപി വിജയിക്കും. കോൺഗ്രസും ഇടതുപക്ഷവും തിരശീലയ്ക്കു പിന്നിൽ സഖ്യമുണ്ടാക്കുന്നതു കേരളവും കാണുന്നുണ്ട്, അദ്ദേഹം പറഞ്ഞു.
രാജ്യത്ത് ജനാധിപത്യം വളരുന്നുവെന്നു സൂചിപ്പിക്കുന്നതാണു തെരഞ്ഞെടുപ്പ് ഫലം. ന്യൂനപക്ഷങ്ങൾ ബിജെപിക്കൊപ്പമാണെന്നും ഈ ഫലം തെളിയിക്കുന്നു, ഗുജറാത്തിലും ഗോവയിലും ഇപ്പോൾ വടക്ക് കിഴക്കൻ സംസ്ഥാനങ്ങളിലും അതാണു വ്യക്തമാകുന്നത്. മേഘാലയ, നാഗാലാൻഡ്, ത്രിപുര എന്നിവിടങ്ങളിലെ ജനങ്ങളുടെ വോട്ട്, വികസനത്തിനും സ്ഥിരതയ്ക്കും വേണ്ടിയുള്ളതായിരിക്കുമെന്ന് ഉറപ്പു തരുന്നു. പഴയ ഗവൺമെന്‍റുകൾ വെല്ലുവിളികളിൽ നിന്നും ഓടിയകന്നിരുന്നു, എന്നാൽ ഈ ഗവൺമെന്‍റ് അതെല്ലാം ഏറ്റെടുക്കും, പ്രധാനമന്ത്രി നരേന്ദ്ര മോദി വ്യക്തമാക്കി.
വിജയാഘോഷത്തിൽ പങ്കെടുക്കാൻ കേന്ദ്ര ആഭ്യന്തര മന്ത്രി അമിത് ഷാ, ബിജെപി ദേശീയ അധ്യക്ഷൻ ജെ. പി നദ്ദ തുടങ്ങിയവരും പാർട്ടി ആസ്ഥാനത്തുണ്ടായിരുന്നു. ആയിരക്കണക്കിനു പ്രവർത്തകരും ആഘോഷത്തിൽ പങ്കുചേർന്നു.
