ന്യൂഡൽഹി: ഇന്ത്യയുടെ നാലാം ചാന്ദ്ര പര്യവേക്ഷണ ദൗത്യം ചന്ദ്രയാൻ- 4 ൽ ഇരട്ട വിക്ഷേപണത്തിന് ഇസ്രൊയുടെ പദ്ധതി. ചന്ദ്രയാന്‍ 4 പേടകം രണ്ടു ഭാഗങ്ങളായാകും വിക്ഷേപിക്കുക. ബഹിരാകാശത്തുവച്ച് രണ്ടു ഭാഗങ്ങളും കൂട്ടിയോജിപ്പിക്കും. തുടർന്ന് പേടകം ചന്ദ്രനിലേക്കു യാത്ര തുടരുമെന്ന് ഇസ്രൊ മേധാവി എസ്‌.സോമനാഥ് അറിയിച്ചു.
ഇസ്രൊയുടെ ചരിത്രത്തിലാദ്യമാണ് ഇരട്ടവിക്ഷേപണവും ബഹിരാകാശത്തെ സംയോജനവും.
ഇസ്രൊയുടെ പക്കലുള്ള ഏറ്റവും കരുത്തേറിയ റോക്കറ്റിനു വഹിക്കാനാകുന്നതിനെക്കാൾ ഭാരമുണ്ട് ചന്ദ്രയാൻ 4 പേടകത്തിന്. ഈ സാഹചര്യത്തിലാണ് രണ്ടു ഭാഗങ്ങളായി വിക്ഷേപിക്കുന്നത്.
