ഗ്വാളിയോർ: ചീറ്റ പ്രോജക്റ്റിന്‍റെ ഭാഗമായി മധ്യപ്രദേശിലെ കുനോ ദേശീയോദ്യാനത്തിലെത്തിച്ച ചീറ്റ പുറത്തു ചാടി. നിലവിൽ ചീറ്റ ഗ്വാളിയോറിലെത്തിയതായാണ് വിവരം. പ്രദേശ വാസികൾ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്. വീര എന്നു പേരിട്ട പെൺചീറ്റയാണ് പുറത്തു ചാടിയത്. ഞായറാഴ്ച ഗ്വാളിയോർ വനത്തിലെത്തിയ ചീറ്റ ഒരു ആടിനെ വേട്ടയാടിപ്പിടിച്ചതായും റിപ്പോർട്ടുണ്ട്. വനം വകുപ്പ് അധികൃതർ ചീറ്റയുടെ നീക്കങ്ങൾ നിരീക്ഷിക്കുന്നുണ്ട്. ചീറ്റയെ തിരിച്ച് ദേശീയോദ്യാനത്തിലെത്തിക്കാനുള്ള ശ്രമങ്ങളും തുടരുകയാണ്.
മേയ് 4ന് പവൻ എന്ന ചീറ്റയും ദേശീയോദ്യാനത്തിന്‍റെ അതിർത്തി കടന്ന് കരോളി ജില്ലയിലെത്തിയിരുന്നു. ഇതിനെ പിന്നീട് വന വകുപ്പ് അധികൃതർ പിടി കൂടി ദേശീയോദ്യാനത്തിലെത്തിച്ചു.
നിലവിൽ 14 കുഞ്ഞുങ്ങൾ അടക്കം 27 ചീറ്റകളാണ് കുനോ ദേശീയോദ്യാനത്തിലുള്ളത്.
