![file image](http://media.assettype.com/metrovaartha%2F2023-08%2F642a7901-b81b-4019-9509-1f08329c5bd5%2Fblast.jpg?w=480&auto=format%2Ccompress&fit=max)
ബെംഗളൂരു: കർണാടകയിലെ ദക്ഷിണ കന്നഡയിലുള്ള ബെൽത്തങ്കടിയിൽ പടക്ക നിർമാണശാലയിലുണ്ടായ സ്ഫോടനത്തിൽ 2 മലയാളികളടക്കം 3 പേർ മരിച്ചു. 6 പേർക്ക് പരിക്കേറ്റു. പരിക്കേറ്റവരിൽ ഒരാൾ മലയാളിയാണ്.
പടക്കനിർമാണശാലയിൽ ജോലി ചെയ്യുകയായിരുന്ന സ്വാമി (55), വർഗീസ് (68) എന്നിവരാണ് മരിച്ച മലയാളികൾ. മലപ്പുറം സ്വദേശിയായ ബഷീറിന്റെ ഫാമിലാണ് പടക്കനിർമാണശാല ഉണ്ടായിരുന്നത്. അപകടം നടക്കുന്ന സമയത്ത് കെട്ടിടത്തിൽ 9 പേർ ഉണ്ടായിരുന്നെന്ന് പൊലീസ് പറഞ്ഞു. പടക്കം നിർമിച്ചിരുന്ന കെട്ടിടം സ്ഫോടനത്തിൽ പൂർണമായും തകർന്നു.
സംഭവത്തിൽ ഫാമുടമ അടക്കം 2 പേരെ പൊലീസ് കസ്റ്റഡിയിലെടുത്തു. സംഭവത്തിൽ സ്ഥാപനത്തിന് ലൈസൻസുണ്ടായിരുന്നോ എന്നതടക്കം പരിശോധിച്ച് വരികയാണെന്ന് പൊലീസ് അറിയിച്ചു.