![ആഘോഷങ്ങളുമായി ആംആദ്മി](http://media.assettype.com/metrovaartha%2F2024-01%2F8f1973e9-2c8c-4875-8644-f9cceb56e6c4%2Fkk.jpg?w=480&auto=format%2Ccompress&fit=max)
ന്യൂഡൽഹി: അയോധ്യയിലെ പ്രാണപ്രതിഷ്ഠാ ചടങ്ങുകളിൽ നിന്നു വിട്ടുനിന്നെങ്കിലും ഡൽഹിയിൽ വൻ ആഘോഷങ്ങൾ സംഘടിപ്പിച്ച് മുഖ്യമന്ത്രി അരവിന്ദ് കെജ്രിവാളും എഎപി നേതാക്കളും.
തലസ്ഥാനത്ത് ശോഭായാത്രകളും സൗജന്യ ഭക്ഷണ വിതരണവുമായാണ് എഎപി പ്രാണപ്രതിഷ്ഠാ ദിനം ആഘോഷിച്ചത്. ""മര്യാദ പുരുഷോത്തമ ഭഗവാൻ ശ്രീരാമനെ മഹാക്ഷേത്രത്തിൽ പ്രതിഷ്ഠിക്കുന്ന ഈ പുണ്യ വേളയിൽ നിങ്ങൾക്കെല്ലാവർക്കും ഹൃദയം നിറഞ്ഞ അഭിനന്ദനങ്ങളും ആശംസകളും നേരുന്നു. സിയാ റാം, ആശംസകൾ''- കെജ്രിവാൾ സമൂഹമാധ്യമത്തിൽ കുറിച്ചു.
ഡൽഹിയിലെ ഷെയ്ഖ് സരായിയിൽ നടന്ന ചടങ്ങിൽ മന്ത്രി സൗരഭ് ഭരദ്വാജ് സുന്ദരകാണ്ഡം വായനയിൽ പങ്കെടുത്തു. ഇതേ ചടങ്ങിൽ മന്ത്രിസഭാംഗം അതിഷി, പൂജയിലും ഹവനത്തിലും പങ്കെടുത്തു. ഐടിഒയിൽ മൂന്നു ദിവസത്തെ രാംലീല സംഘടിപ്പിച്ചിട്ടുണ്ട്. ഡൽഹിയിലെ 70 അസംബ്ലി മണ്ഡലങ്ങളിലും വരും ദിവസങ്ങളിൽ ശോഭായാത്ര നടത്താനും എഎപി തീരുമാനിച്ചിട്ടുണ്ട്.