മുസ്‌ലിം മത സംഘടനയെ നിരോധിച്ച് ജർമനി

ഭരണഘടനാ വിരുദ്ധമാണെന്ന് കണ്ടെത്തി ജർമൻ ഫെഡറൽ മിനിസ്ട്രി ഒഫ് ദ ഇന്‍റീരിയർ കമ്യൂണിറ്റി ജർമനിയിലെ ഇസ്‌ലാമിക് സെന്‍റർ ഹാംബർഗ് എന്ന മത സംഘടനയെയും രാജ്യത്തെമ്പാടുമുള്ള അതിന്‍റെ സകല ഇടപെടലുകളെയും നിയമവിരുദ്ധമായി പ്രഖ്യാപിച്ചു. ഇറാനോടും ഹിസ്ബുള്ളയോടുമുള്ള സംഘടനയുടെ അടുത്ത ബന്ധമാണ് ഈ സംഘടനയെ തീവ്രവാദ ലിസ്റ്റിൽ ഉൾപ്പെടുത്തി നിരോധിക്കാൻ ജർമൻ സർക്കാരിനെ പ്രേരിപ്പിച്ചത്. ജർമനിയിലെ ഫെഡറൽ മിനിസ്ട്രി ഒഫ് ദ ഇന്‍റീരിയർ ആന്‍ഡ് കമ്യൂണിറ്റിയാണ് ഇസ് ലാമിക് സെന്‍റർ ഹാംബർഗ് (IZH) നെ നിരോധിച്ചത്.

ജർമനിയിൽ ഇസ്‌ലാമിസ്റ്റ്-തീവ്രവാദ, ഏകാധിപത്യ പ്രത്യയശാസ്ത്രം പ്രോത്സാഹിപ്പിക്കുന്ന ഇസ്‌ലാമിക് സെന്‍റർ ഹാംബർഗ് എന്ന സംഘടനയെ (IZH) നിരോധിച്ചതായി ആഭ്യന്തര മന്ത്രി നാൻസി ഫൈസർ പ്രസ്താവനയിൽ പറഞ്ഞു.

"ഈ പ്രത്യയശാസ്ത്രം മനുഷ്യന്‍റെ അന്തസിനും സ്ത്രീകളുടെ അവകാശങ്ങൾക്കും സ്വതന്ത്ര ജുഡീഷ്യറിക്കും നമ്മുടെ ജനാധിപത്യ സർക്കാരിനും എതിരാണ്."

ഈ ഗ്രൂപ്പും അതിന്‍റെ ഉപ-സംഘടനകളും ഹിസ്ബുള്ളയെ പിന്തുണയ്ക്കുകയും ആക്രമണാത്മക യഹൂദവിരുദ്ധത പ്രചരിപ്പിക്കുകയും ചെയ്യുന്നു എന്നും അവർ ആരോപിച്ചു. ഇതിനു മുമ്പും ജർമ്മനി 2020 ൽ ഒരു സായുധ ലെബനീസ് ഗ്രൂപ്പിനെ നിയമവിരുദ്ധമാക്കുകയും ഭീകരസംഘടനയായി പ്രഖ്യാപിക്കുകയും ചെയ്തിരുന്നു.

"ഇറാന്‍റെ പരമോന്നത നേതാവിന്‍റെ നേരിട്ടുള്ള പ്രതിനിധിയായിട്ടാണ് ഈ സംഘടന പ്രവർത്തിക്കുന്നത്. ജർമനിയുടെ സ്വതന്ത്രവും ജനാധിപത്യപരവുമായ ഭരണഘടനാ സംവിധാനത്തിന് പുറത്ത് ഒരു ഇസ്ലാമിക വിപ്ലവം സ്ഥാപിക്കുന്നതിനുള്ള താൽപര്യങ്ങൾക്കായിട്ടാണ് ഇത് പ്രവർത്തിക്കുന്നത്'', ജർമൻ ആഭ്യന്തര മന്ത്രാലയം ആരോപിക്കുന്നു.

കഴിഞ്ഞ നവംബറിലാണ് ഇതിനു കാരണമായ സംഭവം. ജർമൻ അധികാരികൾ ഈ ഗ്രൂപ്പുമായി ബന്ധമുള്ള അമ്പത്തഞ്ചോളം സ്വത്തുക്കൾ റെയ്ഡ് ചെയ്തതിനു പിന്നാലെയാണ് ഈ നിരോധന ഉത്തരവ് ജർമനി പുറപ്പെടുവിച്ചത്. ഈ സമയത്ത് സംഘടന വൻതോതിലുള്ള ഗൂഢാലോചനാപരമായ രീതിയിൽ പ്രവർത്തിക്കുന്നുവെന്ന് വ്യക്തമായ തെളിവുകൾ ജർമൻ പൊലീസിനു ലഭിച്ചു.

ഈ മത സംഘടന അവരുടെ തീവ്രവാദപരമായ രാഷ്ട്രീയ ലക്ഷ്യങ്ങൾ മറയ്ക്കാൻ ശ്രമിച്ചതിനുള്ള തെളിവും പൊലീസ് പിടിച്ചെടുത്തു.

ജർമനിയിലെ ഷിയാ വിഭാഗക്കാരായ മുസ് ലിങ്ങളുടെ സമാധാനപരമായ ആചാരത്തിന് ഈ നിരോധനം ബാധകമല്ലെന്നും ആഭ്യന്തരമന്ത്രാലയം കൂട്ടിച്ചേർക്കുന്നു.

ഹാംബർഗിൽ മസ്ജിദ് നടത്തുന്ന ഇസ് ലാമിക് സെന്‍റർ ഹാംബർഗ് (IZH) എന്ന ഈ സംഘടന ദീർഘകാലമായി , ജർമ്മനിയുടെ ആഭ്യന്തര രഹസ്യാന്വേഷണ ഏജൻസിയുടെ നിരീക്ഷണത്തിലാണ്.