മാഡ്രിഡ്: ചാംപ്യന്‍സ് ലീഗ് ഫുട്‌ബോളില്‍ തുര്‍ക്കി ക്ലബ് ഗലറ്റസറെയോട് സമനില വഴങ്ങിയ ഇംഗ്ലീഷ് വമ്പന്മാരായ മാഞ്ചസ്റ്റര്‍ യുണൈറ്റഡ് ചാംപ്യന്‍സീ ലീഗിന്‍റെ നോക്കൗട്ട് കാണാതെ പുറത്തേക്ക്. ഇനി ഒരു മത്രം മാത്രം ശേഷിക്കേ ഗ്രൂപ്പ് എയില്‍ അഞ്ചു മത്സരങ്ങളില്‍നിന്ന് നാല് പോയിന്‍റ് മാത്രമാണ് മാന്‍. യുണൈറ്റഡിനുള്ളത്. ഗലറ്റസറെയുമായി 3-3 സമനിലയാണ് മാഞ്ചസ്റ്റര്‍ ടീം വഴങ്ങിയത്. 3-1ന് മുന്നില്‍നിന്ന ശേഷമാണ് ഇംഗ്ലീഷ് ടീം സമനില വഴങ്ങിയത്. മാഞ്ചസ്റ്ററിനായി ഗമാഞ്ചോ (11), ബ്രൂണോ ഫെര്‍ണാണ്ടസ് (18), മക് ടോമിനെ (55) എന്നിവരാണ് സ്‌കോര്‍ ചെയ്തത്.
അതേസമയം ഗലറ്റസറെയ്ക്കായി സിയെച്ച് (29,62) ഇരട്ട ഗോളുകള്‍ നേടി. 71-ാം മിനിറ്റില്‍ അക്തുര്‍കോഗുലുമാണ് ഗലറ്റസറെയ്ക്ക് സമനില സമ്മാനിച്ചത്. മറ്റൊരു മത്സരങ്ങളില്‍ മിന്നും ജയത്തോടെ റയല്‍ മാഡ്രിഡും ആഴ്‌സണലും പ്രീ ക്വാര്‍ട്ടറിലെത്തി. റയല്‍ രണ്ടിനെതിരേ നാല് ഗോളുകള്‍ക്ക് ഇറ്റാലിയന്‍ ക്ലബ് നാപോളിയെയാണ് പരാജയപ്പെടുത്തിയത്. റോഡ്രിഗോ (11), ബെല്ലിങ്ങാം (22), പാസ് (84), ജൊസേലു (90) എന്നിവരാണ് റയലിന്‍റെ ഗോളുകള്‍ നേടിയത്.
നാപോളിക്കായി സിമിയോണി (9), അഗ്വിസ (47) എന്നിവരാണ് സ്‌കോറര്‍മാര്‍. ആഴ്‌സണല്‍ ലെന്ഡസിനെ ഏകപക്ഷീയമായ ആറ് ഗോളുകള്‍ക്കാണ് തുരത്തി നോക്കൗട്ടില്‍ സ്ഥാനമുറപ്പിച്ചത്. ഹാവെട്‌സ്, ജസ്യൂസ്, സാക, മാര്‍ട്ടിനെല്ലി, ഒഡെഗാര്‍ഡ്, ജോര്‍ഗീഞ്ഞോ എന്നിവരാണ് ആഴ്‌സണലിനായി ഗോളുകള്‍ നേടിയത്. അഞ്ച് കളികളില്‍നിന്ന് 12 പോയിന്‍റോടെയാണ് ആഴ്‌സണല്‍ നോക്കൗട്ട് ഉറപ്പിച്ചത്. മറ്റു മത്സരങ്ങളില്‍ ബയേണ്‍ കോപ്പന്‍ഹേഗനോടു ഗോള്‍ രഹിത സനില വഴങ്ങിയപ്പോള്‍ ബ്രാഗ, യൂണിയന്‍ ബെര്‍ലിനോട് 1-1 സമനിലയും വഴങ്ങി. ബയേണ്‍ നേരത്തെ തന്നെ നോക്കൗട്ട് ഉറപ്പിച്ചിരുന്നു.
