സംസ്ഥാന ടി20 ചാംപ്യൻഷിപ്പ് ഇന്നു മുതൽ
തിരുവനന്തപുരം: എൻഎസ്കെ ട്രോഫി സംസ്ഥാന ട്വന്റി20 ടൂർണമെന്റിന് തുമ്പ സെന്റ് സേവ്യേഴ്സ് കോളെജിലെ കെസിഎ ക്രിക്കറ്റ് ഗ്രൗണ്ടിൽ ഇന്നു തുടക്കം.
കെസിഎ ക്ലബ് ചാംപ്യൻഷിപ്പ്, കെസിഎ പ്രസിഡന്റ്സ് കപ്പ്, വിമെന് പിങ്ക് ചലഞ്ചേഴ്സ് എന്നീ ടൂർണമെന്റുകളുടെ വിജയത്തിനു പിന്നാലെയാണ് കേരള ക്രിക്കറ്റ് അസോസിയേഷൻ പുതിയൊരു ടൂർണമെന്റിനു കൂടി തുടക്കമിടുന്നത്.
അന്തർ-ജില്ലാ അടിസ്ഥാനത്തിലാണ് മത്സരങ്ങൾ. 14 ജില്ലാ ടീമുകൾക്കു പുറമേ കെസിഎ സെലക്റ്റർമാർ തെരഞ്ഞെടുത്ത കംബൈൻഡ് ജില്ലാ ടീമും പങ്കെടുക്കും. ഏപ്രിൽ 15 വരെ ദിവസേന രണ്ടു മത്സരങ്ങൾ. 15 ടീമുകളെ മൂന്ന് പൂളുകളായി തിരിച്ചിട്ടുണ്ട്. ഓരോ പൂളിലും മൂന്നിലെത്തുന്ന രണ്ട് ടീമുകൾ വീതം പ്ലേഓഫ് നോക്കൗട്ട് ഘട്ടത്തിൽ മത്സരിക്കും. ക്രിക്കറ്റ് പരിശീലകനായിരുന്ന എൻ.എസ്. കൃഷ്ണന്റെ സ്മരണാർഥമാണ് എൻഎസ്കെ ട്രോഫി എന്നു പേരു നൽകിയിരിക്കുന്നത്.